މަސްވެރިންނަށް ފަސޭހައިން ތެޔޮ ލިބޭނެގޮތް ހަމަޖެއްސުމަށް އެސްޓީއޯއިން ކޮންމެ އަތޮޅެއްގެ އެއްރަށުގައި ތެޔޮ ސްޓޯރޭޖް ޤާއިމްކުރުމުގެ މަޝްރޫޢު މިއަދު އިފްތިތާޙްކޮށްފިއެވެ.

މި މަޝްރޫޢު އިފްތިތާޙްކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މި ރަސްމިއްޔާތުގައި މަސްވެރިކަމާއި ކަނޑުގެ ވަޞީލަތްތަކާބެހޭ ވުޒާރާގެ ވަޒީރު އަޙްމަދު ޝިޔާމް އަދި އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހިމް ވެސް ވާހަކަފުޅު ދެއްކެވިއެވެ.

^{އެސްޓީއޯގެ އެމްޑީ ޝިމާދު އިބްރާހިމް މިއަދުގެ އިވެންޓުގައި ވާހަކަފުޅުދައްކަވަނީ}

މި މަޝްރޫޢަކީ ރައީސުލްޖުމްހޫރިއްޔާގެ ރިޔާސީ ވަޢުދެއްގެ ދަށުން ކުރިއަށްގެންދާ މަޝްރޫޢެކެވެ. މީގެ ދަށުން ތެޔޮ އަސާސީ ބާވަތެއްގެ ގޮތުގައި ކަނޑައަޅައި، ދިވެހިރާއްޖޭގެ ކޮންމެ އަތޮޅެއްގެ މަދުވެގެން އެއް ރަށެއްގައި އެސް.ޓީ.އޯ ރޭޓުގައި ޕެޓްރޯލް އަދި ޑީސަލް ޢާންމު ރައްޔިތުންނަށް ލިބޭނެ ފަސޭހަ އިންތިޒާމު ހަމަޖެހިގެންދާނެއެވެ.

މި މަޝްރޫޢުގެ ސަބަބުން، ރާއްޖޭގެ ހުރިހާ އަތޮޅެއްގައި މަސްވެރިންނަށް ފަސޭހައިން އެސްޓީއޯ ރޭޓުގައި ޑީސަލް ލިބޭނެ އިންތިޒާމު ހަމަޖެހިގެންދާނެއެވެ. މިއީ ދިވެހި މަސްވެރިންގެ ތާރީޚުގައި ވަރަށް މުހިންމު ދުވަހެއްކަމަށާއި، މަސްވެރިކަމަކީ ދިވެހިރާއްޖޭގެ އިޤްތިޞާދުގެ މައި ލޭނާރުކަމަށް ވުމާއެކު، މަސްވެރިންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަކީ ސަރުކާރުގެ އެންމެ އިސް އަމާޒުތަކުގެ ތެރޭގައި ހިމެނޭކަމެއްކަމަށްވެސް އެސްޓީއޯއިން ފާހަގަކޮށްފައިވެއެވެ.