ދ. ކުޑަހުވަދޫގައި ދިވެހި ރައްޔިތެއްކަން އަންގައިދޭ ކާޑު (އައިޑީ ކާޑު) ޕްރިންޓް ކުރުމުގެ ޚިދުމަތް ރަސްމީކޮށް ފަށައިފިއެވެ.

މި ޚިދުމަތް ފައްޓަވައިދެއްވީ އެކަމަށް ޚާއްޞަކޮށް ބޭއްވި ރަސްމިއްޔާތެއްގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާންއާއި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރެވެ.

ރަސްމިއްޔާތުގައި ވާހަކަދައްކަވަމުން ވަޒީރު ޢަލީ އިޙްސާން ވިދާޅުވީ ރައްޔިތުންނަށް ބޭނުންވާ ޚިދުމަތްތައް އެންމެ ފުރިހަމަ ގޮތުގައި ފޯރުކޮށްދިނުމަށް ރައީސުލްޖުމްހޫރިއްޔާ އިސްކަންދެއްވާ ކަމަށެވެ. އެގޮތުން، އައިޑީ ކާޑުގެ ޚިދުމަތް ރައްޔިތުންގެ ސަލާމަތާއި ރައްކާތެރިކަން ކަށަވަރުވާ ގޮތަށް، ވީ އެންމެ އަވަހަކަށް އަދި އެންމެ އުނދަގޫ ކުޑަ ގޮތަކަށް އަތޮޅުތެރެއިން ލިބޭނެ މަގު ފަހިކުރުމަށް ރައީސް އިރުޝާދު ދެއްވާފައިވާ ކަމަށް އިހުސާން ފާހަގަކުރެއްވިއެވެ.

އިހުސާން އިތުރަށް ވިދާޅުވީ ކައުންސިލްތަކުން ރައްޔިތުންނާ ގާތުން މަސައްކަތްކުރާކަމީ ފާހަގަކޮށްލަންޖެހޭ ކަމެއް ކަމަށެވެ. ނަމަވެސް، އައިޑީ ކާޑު ޕްރިންޓް ކުރުމުގެ ޚިދުމަތް އަވަސް ސްޕީޑެއްގައި ކުރިއަށް ނުގެންދެވެނީ އެއީ ވަރަށް ބޮޑު ޚަރަދެއް ހިނގާ މަސައްކަތަކަށް ވާތީ ކަމަށް އިހުސާން ވިދާޅުވިއެވެ. އަދި މި ޚިދުމަތް ތަޢާރަފްކުރަމުން ދަނީ ކައުންސިލްތަކުން އެދެމުންދާ ތަރުތީބުން ކަމަށްވެސް އިހުސާން ފާހަގަކުރެއްވިއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މަޢުލޫމާތު ދިންގޮތުގައި، ކުޑަހުވަދޫގައި އައިޑީ ކާޑު ޕްރިންޓް ކުރުމުގެ ޚިދުމަތް ފެށިފައިވަނީ ދ. އަތޮޅު ކައުންސިލްގެ އެހީތެރިކަމާއެކުގައެވެ. އަދި މި ޚިދުމަތް ދިނުމަށް ބޮޑު ހޭދައެއް ކުރަންޖެހޭއިރު، އެކަމަށް ބޭނުންވާ މެޝިނަރީޒް ލިބެމުންދާ މިންވަރަކުން ޚިދުމަތް ފޯރުކޮށްދެމުން ގެންދާނެ ކަމަށްވެސް އެ ވުޒާރާއިން ބުންޏެވެ.

ރަސްމިއްޔާތުގައި ވާހަކަދައްކަވަމުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވީ، މި ޚިދުމަތް ފެށުމަކީ ލާމަރުކަޒީ އުސޫލުން ރާއްޖެ ހިންގުމުގެ ނިޒާމު އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް ކަމަށެވެ. އަދި ކައުންސިލްތަކުގެ ބާރުވެރިކަން އިތުރުކޮށް، ރައްޔިތުންނަށް ފޯރުކޮށްދޭ ޚިދުމަތްތައް ފުޅާކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން މި ޚިދުމަތް ފެށިގެންދާކަން ވަޒީރު ފާހަގަކުރެއްވިއެވެ.

ފާހަގަކޮށްލެވޭ ކަމަކީ، ކުޑަހުވަދޫގައި މި ޚިދުމަތް ފެށުމާއެކު، މާލެ ފިޔަވައި އަތޮޅުތެރޭގައި އައިޑީ ކާޑު ޕްރިންޓް ކުރުމުގެ ޚިދުމަތް ފެށި ދެވަނަ ރަށަކަށް ކުޑަހުވަދޫ ވެފައިވާކަމެވެ. އަތޮޅުތެރޭގައި މި ޚިދުމަތް އެންމެ ފުރަތަމަ ފަށާފައިވަނީ ގއ. ވިލިނގިލީގައެވެ.