އަންނަން އޮތް ޖީލުތަކަށް ޤުދުރަތީ ވަޞީލަތްތައް ރައްކާތެރި ކުރުމަށް އަވަސް ފިޔަވަޅުތަކެއް އަޅައިދިނުމަށް ރާއްޖޭގެ ފަތުރުވެރިކަމާބެހޭ ވަޒީރު އިބްރާހީމް ފައިސަލް ކޮމަންވެލްތުގައި އިލްތިމާސްކުރައްވައިފިއެވެ.

ލަންޑަނުގައި އޮތް "ކޮމަންވެލްތު މީޓިންގ އޮން ސަސްޓެއިނަބަލް އެންޑް ރީޖެނެރޭޓިވް ޓޫރިޒަމް" ބައްދަލުވުމަގައި މިނިސްޓަރު ފައިސަލް ވަނީ އަޅުގަނޑުމެންގެ ޤުރަތީ ވަޞީލަތްތައް ރައްކާތެރިކުރުމަކީ ހަމައެކަނި އިޚްތިޔާރީ ކަމަކަށް ހައްދަވައިގެން ނުވާނެ ކަމަށާއި އަންނަން އޮތް ޖީލުތަކަށް މި ވަޞީލަތްތައް ރައްކާތެރި ނުކޮށް ދެމެހެއްޓެނިވި ފަތުރުވެރިކަމެއް ކުރިޔަށް ނުގެންދެވޭނެ ކަމަށް ވެސް އިރުޝާދެ ދެއްވާފައެވެ.

އެހެންކަމުން، ކޮމަންވެލްތުގެ ޤައުމުތަކުން ދެމެހެއްޓެނިވި ފަތުރުވެރިކަމުގެ އުޞޫލުތައް ގެންގުޅުމަށް މިނިސްޓަރު ފައިސަލް އިލްތިމާސް ކުރެއްވިއެވެ.

ދެމެހެއްޓެނިވި ފަތުރުވެރިކަމާއި ތިމާވެށި ޙިމާޔަތް ކުރުމަށް އިލްތިމާސް ކުރައްވަމުން މިނިސްޓަރު ވަނީ ރާއްޖޭގައި ސޯލާ އެނާޖީ ބޭނުންކުރުމާއި، ހަރުދަނާ ކުނި މެނޭޖްކުރުމާއި، ރިސޯޓްތަކުގައި ކަނޑާއި ފަޅު ޙިމާޔަތްކުރުމަށް ކުރަމުންދާ މަސައްކަތްތައް ހިއްސާކުރައްވާފައެވެ. އަދި ފަތުރުވެރިކަމުގައި ޢާންމު ރައްޔިތުން ބައިވެރިކުރުމަށާއި، އީކޯ ޓޫރިޒަމާއި، ޘަޤާފީ ތަޖުރިބާތަކާއި، ޒިޔާރަތްކުރާ ފަރާތްތަކަށާއި ރައްޔިތުންނަށް ފައިދާހުރި ދުޅަހެޔޮކަމުގެ ޙަރަކާތްތަކަށް ވަކާލާތުކުރުމަށް ވެސް ފައިސަލް ވަނީ ކޮމަންވެލްތުގެ ޤައުމުތަކަށް ބާރުއަޅުއްވާފައެވެ. 

މިނިސްޓަރު ފައިސަލްގެ ތަޤުރީރުގައި އިކޯސިސްޓަމްތައް އަލުން އާލާކުރުމުގެ މަޤްޞަދުގައި އެކިބާވަތްތަކުގެ މުރަކަތަކާއި ފަރުތައް އާލާކުރުމާއި ޢާންމުރައްޔިތުން ވީހާވެސް ބޮޑަށް ޝާމިލްކޮށްގެން ފަތުރުވެރިކަން ދެމެހެއްޓެނިވި ގޮތެއްގައި ކުރިޔަށް ގެންދިޔުމަށް އިރުޝާދު ދެއްވިއެވެ.