ރާއްޖޭގެ ތިން ސަރަހައްދެއްގައި ކުރޫޒް ލައިނާތަކަށް ހާއްސަ ޖެޓީތަކެއް ތަރައްޤީކުރުމަށް މަސައްކަތްކުރަމުންދާ ކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ދައުލަތުގެ މީޑިއާ ޕޮރޮގްރާމެއްގައި ވާހަކަ ދައްކަވަމުން ވަޒީރު ފައިޞަލް ވިދާޅުވީ ރާއްޖެއަށް އަންނަ ކުރޫޒް ލައިނާތައް އިތުރުކުރުމަށް ގިނަ މަސައްކަތްތަކެއް ކުރުމަށް ރާވާފައިވާކަމަށެވެ. އެގޮތުން އައްޑޫ އަދި ލާމު އަތޮޅު ފަދަ ތިން ސަރަހައްދެއްގައި ކުރޫޒް ލައިނާތަކަށް ހާއްސަ ޖެޓީތަކެއް ނުވަތަ ބަނދަރުތަކެއް ތަރައްޤީކުރުމަށް ދިރާސާކުރަމުންދާ ކަމަށް ވަޒީރު ހާމަކުރެއްވިއެވެ.

"އައްޑޫ ކަހަލަ ލާމު އަތޮޅު ކަހަލަ ތިން ސަރަހައްދެއްގައި، މިދަނީ ބަލައި ދިރާސާކުރަމުން، ކޫރޫޒު ލައިނާތަކަށް ހާއްސަ ޖެޓީތައް ނުވަތަ ބަނދަރުތައް ހަދާ، ކުރޫޒް ލައިނާތައް އެ ހިސާބުތަކަށް ގެންދިޔުމަށް، ވަރަށް ބޮޑު ކުރިއެރުމަކަށް މިކަން ވާނެ،" ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ ކުރޫޒް ލައިނާތަކަށް ރާއްޖޭގައި ހުރި ދަތިތަކަށް ލުޔެއް ހޯދައިދީފައިވާ ކަމަށެވެ. އެގޮތުން ކުރީގެ ސަރުކާރުން ހަދާފައިވާ ގަވާއިދެއްގެ ދަށުން ކުރޫޒް ލައިނާތައް ރާއްޖެއަށް އައުމަށް އޮތް ދަތިތައް ނައްތާލުމަށް އެ ގަވާއިދު އިސްލާހުކޮށްފައިވާ ކަމަށް ވަޒީރު ފާހަގަކުރެއްވިއެވެ.

މި އިސްލާހުތަކާއެކު، މިދިޔަ އަހަރާއި މި އަހަރުގެ މިހާތަނަށް 600 އަށް ވުރެ ގިނަ ފަތުރުވެރިން ކުރޫޒް ލައިނާތަކުގައި ރާއްޖެއަށް ޒިޔާރަތްކޮށްފައިވާކަން ވަޒީރު ހާމަކުރެއްވިއެވެ. އަދި މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނެފައިވާ ގޮތުގައި ރާއްޖޭގެ ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކްރޫޒް ލައިނާއެއް ރާއްޖެ އައުމަށް ތާވަލުކޮށްފައިވާ ކަމަށް ވެސް ވަޒީރު ފާހަގަކުރެއްވިއެވެ.

މި މަޝްރޫޢުތަކުގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބި، ކުރޫޒް ޓޫރިޒަމް އިތުރަށް ކުރިއަރައިގެންދާނެ ކަމަށް ލަފާކުރެވެއެވެ.