ޕްލާސްޓިކް ތަޣައްޔަރުވުމާއި ދެކޮޅަށް ސަރަޙައްދީ ތަމްރީނު ޕްރޮގްރާމެއް ފަށައިފި

ދެކުނު އޭޝިޔާ ސަރަޙައްދުގައި ޕްލާސްޓިކް ތަޣައްޔަރުވުމާއި ދެކޮޅަށް އިންނޮވޭޓިވް ފައިނޭންސިންގ އޮޕްޝަންތަކާއި ބެހޭ ސަރަޙައްދީ ތަމްރީނު ޕްރޮގްރާމެއް މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް، އޮނަރަބަލް ޠާރިޤް އިބްރާހީމް މިއަދު ހެނދުނު ރަސްމީކޮށް ފައްޓަވައި ދެއްވައިފިއެވެ

މި ޕްރޮގްރާމަކީ ސައުތު އޭޝިޔާ ކޯޕަރޭޓިވް އެންވަޔަރަންމަންޓް ޕްރޮގްރާމް (ސެކެޕް) އިން ޕްލީޒް ޕްރޮޖެކްޓްގެ ދަށުން އިންތިޒާމް ކޮށްގެން ކުރިއަށް ގެންދާ ޕްރޮގްރާމެކެވެ. މި ޕްރޮގްރާމުގެ މައިގަނޑު މަޤްޞަދަކީ ދެކުނު އޭޝިޔާ ސަރަޙައްދުގައި ޕްލާސްޓިކް ތަޣައްޔަރުވުމާއި ދެކޮޅަށް ކުރެވޭ މަސައްކަތްތަކަށް އައު އަދި އުފެއްދުންތެރި ފައިނޭންސިންގ އޮޕްޝަންތައް ތަޢާރަފު ކުރުމެވެ.

މިނިސްޓަރ ޠާރިޤް އިބްރާހީމް ވިދާޅުވީ ޕްލާސްޓިކް ތަޣައްޔަރު ވުމަކީ މުޅި ދުނިޔެއަށް ކުރިމަތި ވެފައިވާ ބޮޑު ގޮންޖެހުމެއް ކަމަށާއި، މި މައްސަލައަށް ޙައްލު ހޯދުމަށް އިތުރު ފައިސާ ބޭނުންވާ ކަމަށެވެ. އަދި މި ޕްރޮގްރާމުން ސަރަޙައްދުގެ ޤައުމުތަކަށް އެކަމަށް އައު މަގުތަކެއް ފަހިވެގެންދާނެ ކަމަށް އުންމީދު ކުރައްވާ ކަމަށް ވެސް ވިދާޅުވިއެވެ.

މި ތަމްރީނު ޕްރޮގްރާމުގައި ދެކުނު އޭޝިޔާގެ އެކި ޤައުމުތަކުން ވަޑައިގެންނެވި ތިމާވެށީގެ ދާއިރާގެ މާހިރުންނާއި ސިޔާސަތު އެކުލަވާލާ ފަރާތްތައް ބައިވެރިވެ ވަޑައިގަންނަވައެވެ. ޕްރޮގްރާމް ކުރިއަށްދާނީ ކުރިއަށް އޮތް ދެ ދުވަހުގެ މުއްދަތަށެވެ.