ޓޫރިޒަމް އެންޑް އެންވަޔަރަމަންޓް މިނިސްޓްރީގެ ޕާމަނަންޓް ސެކްރެޓަރީ (ޕީއެސް) ގެ މަގާމަށް ބޭފުޅަކު ހޯދުމަށް ސިވިލް ސާވިސް ކޮމިޝަން (ސީއެސްސީ) އިން މިއަދު އިޢުލާނުކޮށްފިއެވެ.
މިއީ ޓޫރިޒަމް މިނިސްޓްރީ އާއި އެންވަޔަރަމަންޓް މިނިސްޓްރީ އެއްކޮށްލުމާއި ގުޅިގެން، އެ މަޤާމު ހުސްވެފައި އޮތުމާއި ގުޅިގެން ކުރި އިޢުލާނެކެވެ.
މި ދެ ވުޒާރާ އެއްކޮށްލުމާއި ގުޅިގެން، އެ ވުޒާރާ ޙަވާލުކުރެއްވީ ކުރީގެ އެންވަޔަރަމަންޓް މިނިސްޓަރަކަށް ހުންނެވި ތޯރިގް އިބްރާހިމް އާއެވެ.
Advertisement
ސިވިލް ސާވިސް ކޮމިޝަނުން ކުރި އިޢުލާނުގައި ބަޔާންކޮށްފައިވާ ގޮތުން، ޕީއެސްގެ މަގާމަށް ޝަރުތު ހަމަވާ ފަރާތްތަކުން މި މަހުގެ 11 ވަނަ ދުވަހުގެ ކުރިން ސީއެސްސީއަށް ހުށަހަޅަންވާނެއެވެ. މި މަގާމަށް ހޮވޭ ފަރާތަށް މުސާރައިގެ ގޮތުގައި މަހަކު 20،500 ރުފިޔާ އަދި ލިވިންގ އެލަވަންސްގެ ގޮތުގައި މަހަކު 15،000 ރުފިޔާ ލިބޭނެ ކަމަށް އިޢުލާނުގައި ބަޔާންކޮށްފައިވެއެވެ.
މިނިސްޓްރީތަކުގެ ޕާމަނަންޓް ސެކްރެޓަރީންނަކީ ކޮންމެ ތަނެއްގައި ވެސް ސިވިލް ސާވިސްގެ ފަރާތުން ހުންނަ އެންމެ އިސް މުވައްޒަފު ކަމަށްވާތީ، މި މަގާމަށް ހޮވޭ ފަރާތުގެ ދައުރު ވަރަށް މުހިންމު ކަމަށް ފާހަގަކުރެވެއެވެ.
