"ސައުތުއަރި މެރިން ޕްރޮޓެކްޓެޑް އޭރިއާ" (ސަންޕާ) އަށް ފެހުރިހި ބަލަން ޓޫރިސްޓުން ގެންދާ އުޅަނދުފަހަރުގެ ބުރަފަތީގައި ޕްރޮޕެލާ ގާޑު އެޅުވުން ސަރުކާރުން މަޖުބޫރު ކޮށްފިއެވެ.
ސަންޕާއަކީ އދ. ރަންގަލި ފަރު ސަރަހައްދުގައި 2009 ގައި ހިމާޔަތް ކުރެވުނު، ފެހުރިހި ވަރަށް ގިނަ ޢަދަދަކަށް އުޅޭ މަޝްހޫރު ސަރަހައްދެކެވެ. އެ ސަރަހައްދަކީ ޓޫރިސްޓުން ގޮވައިގެން ފީނަން އުޅުމުގެ ތެރޭގައި ލޯންޗުގެ ބުރަފަތީގައި ޖެހި ހިތާމަވެރި ހާދިސާތައް ހިނގާފައިވާ ތަނެކެވެ.
އެންވަޔަރަންމަންޓް މިނިސްޓްރީން އާންމުކުރި ޕްލޭނުގައި ވާގޮތުން ޓޫރިސްޓުން ގެންދާ އުޅަނދު ތަކުގައި ތިންމަސް ތެރޭ ޕްރޮޕެލާ ގާޑު އެޅުވުން ލާޒިމެވެ. އަދި 12 މަސް ތެރޭ އެހެން އުޅަނދު ތަކުގައި ވެސް ގާޑު ހަރުކުރުން މަޖުބޫރު ކުރުމާއި، ފަތުރުވެރިން ގޮވައިގެން އެފަދަ އެކްޓިވިޓީ ތަކުގައި އުޅޭ އުޅަނދުތައް އީޕީއޭގައި ރަޖިސްޓަރީ ކުރަން ޖެހެއެވެ.
Advertisement
މީގެ އިތުރުން، ފެހުރިހި ބަލަން ފީނުމަށް އެއްފަހަރާ އެ ސަރަޙައްދަށް މޫދަށް ފައިބައިގެން އުޅެވޭނީ ވެސް ގިނަވެގެން 60 މީހުންނަށް ކަމަށާއި، ފެހުރިހީގެ ވަށައިގެންވާ 250 މީޓަރުގެ ސަރަހައްދަކީ ކޮންޓެކްޓް ޒޯންކަމަށް ކަނޑައަޅައި އެ ސަރަޙައްދުގައި އެއްފަހަރާ ޙަރަކާތްތެރިވެވޭނީ ގިނަވެގެން 3 އުޅަނދަށް ކަމަށް ވެސް ބުނެފައި ވެއެވެ.
ފެހުރިހީގެ 50 މީޓަރު ބައުންޑްރީ ތެރޭގައި އުޅަނދުތަކުގެ ބާރުމިން ބަހައްޓަން ވާނީ ގަޑިއަކު ދެ ނޮޓުގަ އެވެ. ނަމަވެސް، ސަލާމަތީ ހާލަތްތަކުގައި ކޮންޓެކްޓް ޒޯނު ނުކުތުމަށް ގަޑިއަކު ފަސް ނޮޓަށް ވުރެ ބާރަށް ދުއްވަން ޖެހިއްޖެ ހާލަތުގައި އެ ޒޯނުން ވީހާ ވެސް އަވަހަކަށް ނުކުމެވޭނެ އެވެ.
ފެހުރިއްސަކީ ނެތިދިއުމުގެ ބިރު ހީވެފައިވާ ދިރުމެއްކަމަށް އައިޔޫސީއެންއިން ކަނޑައަޅާފައި ވަނީ 2016ނވަނަ އަހަރުގައެވެ.
