ރާއްޖޭގެ ފުރަތަމަ ސޯލާ ފެރީ އަންނަ އޭޕްރީލް މަހުގެ ފުރަތަމަ ހަފްތާގައި ރާއްޖެއަށް ގެނެވޭނެ ކަމަށް އިންޑިއާގެ ނޭވަލްޓް ކުންފުނިން މިއަދު ހާމަކޮށްފިއެވެ. 9.3 މިލިއަން ރުފިޔާގެ މި ފެރީއަކީ ތިމާވެއްޓާ ރައްޓެހި، ރާއްޖެއިން ފުރަތަމަ ފަހަރަށް ބަންނަ ސޯލާ ފެރީއެވެ.
ނޭވަލްޓް ކުންފުނީގެ ސީއީއޯ ސަންދިތު ތަންދަޝެރީ ވިދާޅުވި ގޮތުގައި، "އެޕޯލޯ" ނަމުން މަޝްހޫރުވެފައިވާ މި ފެރީގެ އެންމެ ފަހުގެ މަސައްކަތްތައް މިހާރު ދަނީ ކުރިއަށެވެ. މި ފެރީގައި 75 ސޯލާ ޕެނަލް ހަރުކޮށްފައިވާ ކަމަށާއި، މިއީ ކަނޑު ގަދަ ދުވަސްވަރުގައިވެސް ދުއްވޭ ގޮތަށް ފަރުމާކޮށްފައިވާ އުޅަނދެއް ކަމަށް އޭނާ ވިދާޅުވިއެވެ.
75 މީހުންގެ ޖާގަ ހިމެނޭ މި ފެރީގެ ސްޕީޑަކީ ގަޑިއަކު 8 ނޯޓިކަލް މޭލެވެ. އަދި މި ފެރީގައި 50 ކިލޯވޮޓުގެ ދެ ބެޓަރީ ޕެކާއި 40 ކިލޯވޮޓްގެ ދެ އިންބޯޑް އިލެކްޓްރިކް މޯޓަރު ހިމެނެއެވެ. 25 ކިލޯވޮޓުގެ ސޯލާ ޕެނަލް ސިސްޓަމުން ބެޓެރިތައް ޗާޖުކުރެވޭނެއެވެ.
Advertisement
ފަތުރުވެރިކަމާއި، ތިމާވެއްޓާއި ބެހޭ ވަޒީރު ތޯރިގް އިބްރާހިމް މީގެކުރިން ވިދާޅުވެފައިވަނީ ރާއްޖޭގެ ހުރިހާ ކަންކޮޅުތަކެއްގައި ދަތުރުފަތުރު ކުރުމަށް ބޭނުން ކުރާ އުޅަނދުތައް ދުއްވަނީ ޑީސަލް ނޫނީ ޕެޓްރޯލް ބޭނުންކޮށްގެން ކަމަށާއި، ރާއްޖޭގެ އެކިކަންކޮޅުތަކުގައި ސޯލާ ބޭނުންކޮށްގެން ފެރީ އޮޕަރޭޓް ކުރެވޭތޯ ބެލުމަކީ މުހިންމު ކަމެއް ކަމަށެވެ.
މި ފެރީ ބޭނުން ކުރާނީ މާލެ ސަރަހައްދުގައި ކަމަށް ވަނީ ހާމަކޮށްފައެވެ. އަދި މިއީ އިންޑިއަން ރަޖިސްޓާ އޮފް ޝިޕިންގެ ދަށުން ބަނދެފައިވާ، ސަލާމަތީ ގޮތުން ވަރުގަދަ އުޅަނދެއް ކަމަށްވެސް ބުނެފައިވެއެވެ.
