މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ)ގެ އެނުއަލް ޖެނެރަލް މީޓިން (އޭޖީއެމް) ރޭ މެންހަޓަން ބިޒްނަސް ހޮޓެލްގައި ބާއްވައިފިއެވެ. މި ޖަލްސާގައި މަޓާޓޯއިން ވަނީ އާ ބޯޑު މެމްބަރުންނާއި އެކްޒެކެޓިވުން އައްޔަންކޮށް، ލޯގޯވެސް ރީބްރޭންޑް ކޮށްފައެވެ.
މި ޙަފްލާ ޝަރަފުވެރިކޮށްދެއްވީ ފަތުރުވެރިކަމާއި ބެހޭ ވަޒީރު އިބްރާހިމް ފައިސަލެވެ.
2006 ވަނަ އަހަރު އުފެދުނު މަޓާޓޯއަކީ ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމަށް މަސައްކަތްކުރާ، ބައިނަލްއަގްވާމީ ގޮތުން ވެސް ބަލައިގަނެވިފައިވާ ޖަމިއްޔާއެކެވެ. މިއަހަރު މަޓާޓޯއިން ސާފް ޓޫރިޒަމް ފުޅާކުރުމަށް އިސްކަންދޭނެކަމަށް ބެލެވެއެވެ.
ދިވެހިރާއްޖެއަކީ ދުނިޔޭގެ އެންމެ ރަނގަޅު ސާފިންގ ސަރަޙައްދުތައް ހުންނަ ޤައުމުތަކުގެ ތެރޭގައި ހިމެނޭ ޤައުމެއްކަމުން، ސާފިންގ ޓޫރިޒަމްގެ ސަބަބުން ބޭރުގެ ފަތުރުވެރިންގެ އަދަދު އިތުރުވުމުގެ ފުރުޞަތު އޮތުމުގެ އިތުރުން، ރަށްވެހިންގެ ވިޔަފާރިތަކަށް ވެސް އެހީތެރިކަން ލިބިގެންދާނެއެވެ. މީގެ އިތުރުން، ދެމެހެއްޓެނިވި ފަތުރުވެރިކަމަށް އޮތް ފުރުޞަތުގެ ސަބަބުން ތަރައްޤީއާއި ތިމާވެށި ރައްކާތެރިކުރުމާ ދެމެދު ބެލެންސެއް ޤާއިމުކުރުމަކީ ޙާޞިލުކުރެވިދާނެ ކަމެކެވެ..
މި އައު އަމާޒާއެކު، ދިވެހިރާއްޖޭގެ ފަތުރުވެރިކަމުގެ އަސާސް ތަފާތުކުރެވި، ދުރު މުސްތަޤުބަލުގައި އިޤްތިޞާދީ ގޮތުން އިތުރަށް ވަރުގަދަވެގެންދާނެ ކަމަށް ބެލެވެއެވެ.
