ސަރުކާރުގެ އަމާޒަކީ އަންނަ އަހަރު ފަތުރުވެރިކަމުން ލިބޭ އާމްދަނީ 5 ބިލިޔަން ޑޮލަރަށް އެރުވުން ކަމަށް ފަތުރުވެރިކަމާއިބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.
ވަޒީރު މިހެން ވިދާޅުވީ، މިއަހަރު ރާއްޖެއަށް ޒިޔާރަތްކުރި 2 މިލިޔަންވަނަ ފަތުރުވެރިޔާއަށް މަރުޙަބާ ކިޔުމަށް މިއަދު ވެލާނާ އިންޓަރނޭޝަނަލް އެއަރޕޯޓްގައި ބޭއްވި ރަސްމިއްޔާތުގައި މީޑިއާއާ ވާހަކަދައްކަވަމުންނެވެ.
ވަޒީރު ވިދާޅުވީ، މިއަހަރަކީ ރާއްޖޭގެ ފަތުރުވެރިކަމުގައި ގިނަ ރެކޯޑުތަކެއް ހެދި އަހަރެއް ކަމަށެވެ. އެގޮތުން، މިއަހަރަކީ މިހާތަނަށް ރާއްޖެއަށް އެންމެ ގިނަ ޢަދަދަކަށް ފަތުރުވެރިން ޒިޔާރަތްކުރި އަހަރު ކަމަށާއި، އެއް ދުވަހެއްގައި އަދި އެއް މަހެއްގައި ރާއްޖެއަށް އެންމެ ގިނަ ފަތުރުވެރިން އައި އަހަރު ކަމަށް ވަޒީރު ފާހަގަކުރެއްވިއެވެ.
ވަޒީރު ވިދާޅުވީ، މިއަހަރުގެ ފެބްރުއަރީ މަހު 217،000 ފަތުރުވެރިން ރާއްޖެއަށް ޒިޔާރަތްކުރި ކަމަށާއި، މިއީ ރާއްޖޭގެ ތާރީޚުގައި އެއް މަހެއްގައި އެންމެ ގިނަ ފަތުރުވެރިން ޒިޔާރަތްކުރި މަސް ކަމަށެވެ. އަދި އެންމެ އަވަހަށް 1 މިލިޔަން ފަތުރުވެރިން ހަމަކުރެވުނީވެސް މިއަހަރުގެ ތެރޭގައި ކަމަށް ވަޒީރު ފާހަގަކުރެއްވިއެވެ.
އަންނަ އަހަރުގެ އަމާޒުތަކާ ބެހޭގޮތުން ވާހަކަދައްކަވަމުން، ވަޒީރު ވިދާޅުވީ ސަރުކާރުގެ އަމާޒަކީ ފަތުރުވެރިކަމުން %15 ގެ ކުރިއެރުމެއް ހޯދުން ކަމަށެވެ. މިކަން ޙާޞިލުކުރުމަށްޓަކައި މާކެޓިންގ ހަރަކާތްތައް އިތުރުކޮށް، މައި މާކެޓްތަކުގައި ރާއްޖެ އިޝްތިހާރުކުރުމުގެ ހަރަކާތްތައް އިތުރުކުރާނެ ކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، މިއަހަރުގެ އަމާޒު ޙާޞިލުކުރުމުގައި އެމްއެމްޕީއާރުސީއާއި ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ އެއްބާރުލުން ވަރަށް ބޮޑު ކަމަށެވެ. އަދި އަންނަ އަހަރުގެ އަމާޒު ޙާޞިލުކުރުމަށްޓަކައި މުޅި ސަރުކާރާއި މުޅި ޓީމު ގުޅިގެން މަސައްކަތްކުރާނެ ކަމަށް ވަޒީރު ވިދާޅުވިއެވެ.
