ﷲ ސުބުޙާނަހޫ ވަތަޢާލާ އަޅުގަނޑުމެންނާ ހިސާބަށް ކީރިތި ޤުރުއާން ބާވާލައްވަވާފައިވަނީ ޝާޢިރުން ނުވަތަ ޅެންވެރިން ވެސް ޙައިރާންވާހާ ފުރިހަމައަށް ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ވަޒީރު މިހެން ވިދާޅުވީ ތިލަދުންމަތީ ދެކުނުބުރީ އަތޮޅު ކައުންސިލުން އިންތިޒާމުކޮށްގެން އެ އަތޮޅު ހަނިމާދޫގައި ބޭއްވި ތިލަދެކުނު ޤުރުއާން މުބާރާތް 2024 ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.

ކީރިތި ޤުރުއާނާ ބެހޭ ގޮތުން ރޭގެ ޖަލްސާގައި ވާހަކަދައްކަވަމުން ވަޒީރު ވިދާޅުވީ އަޅުގަނޑުމެން މުސްލިމަކަށް ވީތީ އަޅުގަނޑުމެން އެންމެ ދޯޅަ، އަޅުގަނޑުމެން އެންމެ ގާތްވާންޖެހޭ ފޮތަކީ ކީރިތި ޤުރުއާން ކަމަށެވެ. އަދި މުޅި އިސްލާމީ އުންމަތަށާއި، މި އުންމަތުގެ އެންމެންނަށް އެންމެ ތަޖުރިބާ ހުރި އެންމެ ޢިލްމީ އަދި މިހާތަނަށް ސައެންސްގެ އަލީގައި ވެސް އާ ކަމެއް ނުހޯދޭ، އެ ހުރިހައި ކަމެއް ހިމެނިފައިވާ ފޮތަކީ ވެސް ކީރިތި ޤުރުއާން ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ރީތިކޮށް ޤުއާން ކިޔަވާ އަޑު އެހުމަކީ ވެސް އަޅުގަނޑުމެންގެ ހިތަށް ވަރަށް ބޮޑު ފިނިކަމެއް ލިބިގެންދާ ކަމެއް ކަމަށެވެ. އަދި މި ފަނާވަނިވި ދުނިޔޭގައި ކުރާ ކޮންމެ ތަޖުރިބާއަކާއި، ލިބޭ ކޮންމެ ވޭނަކުން ސަލާމަތްވުމުގެ ހުރިހައި ޝިފާއެއް ލައްވާފައި ވަނީ ކީރިތި ޤުރުއާނުގައި ކަމަށް ވަޒީރު ވިދާޅުވިއެވެ.

މި ރަސްމިއްޔާތުގައި ވަޒީރު ވަނީ ފަޚުރުވެރި ވަނަތައް ޙާޞިލްކުރި ދަރިވަރުންނަށް އިނާމާއި ސެޓްފިކެޓް ޙަވާލުކޮށްދެއްވާފައެވެ. މުޅި މުބާރާތުން 3 ވަނަ ދަރިވަރަކަށް ހޮވުނީ ޢަފީފުއްދީން ސުކޫލްގެ މުޙައްމަދު ލަސަން ފަޟީލެވެ. މުޅި މުބާރާތުން 2 ވަނަ ޙާޞިލްކުރީ މަކުނުދޫ ސުކޫލްގެ ނާޔާ ބިންތު އަޒްހަރު ޢަބްދުލްޢަލީމެވެ. އަދި މުޅި މުބާރާތުން ފަޚުރުވެރި 1 ވަނަ ޙާޞިލްކުރީ ޖަލާލުއްދީން ސުކޫލްގެ އިބްރާހީމް މަލްސޫން މުޙައްމަދެވެ.

މުޅި މުބާރާތުން 3 ވަނަ ސުކޫލަކީ ޖަލާލުއްދީން ސުކޫލެވެ. މުޅި މުބާރާތުން 2 ވަނަ ސުކޫލަކީ ނޮޅިވަރަމް ސުކޫލެވެ. އަދި މުޅި މުބާރާތުން 1 ވަނަ ސުކޫލަކީ މަކުނުދޫ ސުކޫލެވެ.