އަންނަ އަހަރު ހުޅުމާލޭގައި ޒަކާތު ހައުސްއަށް ޚާއްސަ އިމާރާތެއް ޤާއިމުކުރުމުގެ މަސައްކަތް ފެށުމަށް ސަރުކާރުން ނިންމައިފިއެވެ.

މިކަން ހާމަކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދެވެ.

ވަޒީރު ޝަހީމް މިހެން ވިދާޅުވީ "ވަންގަވް" މެދުވެރިކޮށް ޒަކާތު ބޭސްފަރުވާގެ ޚިދުމަތް ތައާރަފްކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. ވަޒީރު ވިދާޅުވިގޮތުގައި މި އިމާރާތް އެޅުމަށް ބޭނުންވާ ބިން މިހާރު ވަނީ ހަމަޖެހިފައެވެ. އަދި 2025 ވަނަ އަހަރު އިމާރާތުގެ މަސައްކަތް ފެށޭނެކަމަށް އުންމީދުކުރެވޭ ކަމަށް ވަޒީރު ވިދާޅުވިއެވެ.

"އަމާޒަކީ މޯލްޑިވްސް ޒަކާތު ހައުސް ހުޅުމާލޭގައި ޤާއިމްކުރުން. މިކަމަށްޓަކައި ކުރަން ޖެހޭ މަސައްކަތް ވަނީ ފެށިފައި. ބިން ވަނީ ހަމަޖެހިފައި. 2025 އަހަރު ބިލްޑިން އެޅުމުގެ މަސައްކަތް ފެށިގެންދާނެ." ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ ޒަކާތު ހައުސްއަކީ ރާއްޖޭގައި ހުރި އެންމެ ހަރުދަނާ އަދި ރައްޔިތުންނާ އެންމެ ގާތުން ޚިދުމަތްދޭ އިޖްތިމާއީ މުއައްސަސާއަށް ހެދުމަކީ އަމާޒެއް ކަމަށެވެ. އަދި ޒަކާތުގެ ބެނެފިޝަރީންނަށް އެންމެ މަތީ ފެންވަރުގެ ޚިދުމަތެއް ދިނުމަކީވެސް މުހިންމު ކަމެއްކަމަށް ވަޒީރު ފާހަގަކުރެއްވިއެވެ.

"އިސްލާމީ ދީނުގައި އޮތް އިޖްތިމާއީ އެންމެ ބޮޑު ފަންޑަކީ ޒަކާތުގެ ފަންޑު. އެހެންކަމުން ޒަކާތުގެ ބެނެފިޝަރީންނަށް އެންމެ މަތީ ޚިދުމަތެއް ދިނުމަކީ އަޅުގަނޑުމެންގެ އަމާޒެއް. ދިވެހިރާއްޖޭގެ ޒަކާތު ހައުސް ވެގެންދާނީ މުހިންމު ޤައުމީ އިދާރާއަކަށް." ވަޒީރު ވިދާޅުވިއެވެ.

ޒަކާތު ހައުސްގެ ބޭސްފަރުވާގެ ޚިދުމަތް "ވަންގަވް" ޕްލެޓްފޯމަށް ތަޢާރަފްކުރުމާއެކު، މިއަދުން ފެށިގެން ކައުންޓަރަށް ނުވަތަ އީމެއިލް މެދުވެރިކޮށް ޒަކާތު ފަންޑުން ބޭސްފަރުވާގެ އެހީއަށް އެދި ހުށަހަޅާ ފޯމުތައް ބަލައިނުގަންނާނެކަމަށް ވަނީ އިއުލާނު ކޮށްފައެވެ. މި ބަދަލާއެކު، ރައްޔިތުންނަށް ވީހާވެސް ލުއި ފަސޭހަކަމާއި އަވަސްކަމާއެކު ޚިދުމަތަށް އެދެވޭނެ އިންތިޒާމް ވަނީ ހަމަޖެހިގެން ގޮސްފައެވެ.

ޓްރޭޑް ނެޓް މޯލްޑިވްސް ޕްރައިވެޓް ލިމިޓެޑްގެ މެނޭޖިންގ ޑިރެކްޓަރ ސައީދާ އުމަރު ވިދާޅުވިގޮތުގައި މި އަހަރު ނިމުމުގެ ކުރިން ސަރުކާރުގެ 17 އިދާރާއެއް "ވަންގަވް" ޕްލެޓްފޯމަށް ގެނައުމަކީ އަމާޒެކެވެ. މިއީ ސަރުކާރުގެ "އެއްފުރާޅުގެ" ސިޔާސަތުގެ ދަށުން ކުރިއަށްގެންދާ މަސައްކަތެއްކަމަށް ސައީދާ ފާހަގަކުރެއްވިއެވެ.

"ސަރުކާރުން ފައްޓަވާފައިވާ އެއްފުރާޅު ކުރުމުގެ ސިޔާސަތުގެ ދަށުން ޑިޖިޓަލް ފޯމެޓެއްގައި ވަންގަވްގެ ޕްލެޓްފޯމަށް ގެނެވި ރައްޔިތުންނަށް އޭގެ ލުއިފަސޭހަކަމާއެކު މުޅި ރާއްޖެއަށް ފުޅާވެގެންދިއުމަކީ އަޅުގަނޑުމެންގެ އަމާޒެއް." ސައީދާ ވިދާޅުވިއެވެ.

ސައީދާ އިތުރަށް ވިދާޅުވީ ވަންގަވް މެދުވެރިކޮށް ބޭސްފަރުވާގެ ޚިދުމަތަށް އެދުމުގެ ޚިދުމަތަކީ ރާއްޖޭގެ އެކި ކަންކޮޅުތަކުގެ މީހުންނަށް ފަސޭހަވެގެންދާނެ ޚިދުމަތެއް ކަމަށެވެ. އަދި މިއާއެކު އެހެން ވުޒާރާތަކުގެ އެކި ޚިދުމަތްތައްވެސް ވަންގަވްއަށް އަންނާނެ ކަމަށް އުންމީދުކުރައްވާ ކަމަށް ސައީދާ ވިދާޅުވިއެވެ.