ދިވެހިރާއްޖޭގެ ޤައުމީ ދިފާޢީ ބާރުގެ ސްޕެޝަލް ބޯޓު ސްކޮޑްރަން މިއަދު އިފްތިތާހުކޮށްފިއެވެ. ކަނޑުއަޑީގެ އޮޕަރޭޝަންތަކަށް ޚާއްސަ މި ސްކޮޑްރަން އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ދިފާޢީ ބާރުގެ ކޯސްޓްގާޑުގައި އޮންނަ މި ޚާއްސަ ސްކޮޑްރަން އިފްތިތާހުކުރެވުނީ ނަޞްރުގެ ދުވަހުގެ މުނާސަބަތުގައި ޖުމްހޫރީ މައިދާނުގައި ސިފައިން ކުރިއަށް ގެންދިޔަ އަސްކަރީ ޙަރަކާތްތަކަށް ފަހުގައެވެ. މި ރަސްމިއްޔާތުގައި ސްޕެޝަލް ބޯޓް ސްކޮޑްރަންގެ އަޒުމް ލައިދެއްވީ ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަޙްމަދު ގިޔާޘްއެވެ.
ނަޞްރުގެ ދުވަސް ފާހަގަކުރުމުގެ ގޮތުން ބޭއްވުނު މި ޟަރަކާތްތަކުގެ ތެރޭގައި ޤައުމީ ދިފާޢީ ބާރުންވަނީ އަސްކަރީ ހަތިޔާރުތަކާއި އުޅަނދުތައް ޢާއްމުންނަށް ދައްކާލާފައެވެ. މިކަމުގެ ސަބަބުން ޢާއްމު ރައްޔިތުންނަށް ދިވެހި ސިފައިންގެ ޤާބިލުކަމާއި ތައްޔާރީ ހާލަތު ވަޒަންކުރުމުގެ ފުރުސަތު ލިބިގެންދިޔައެވެ.
ސްޕެޝަލް ބޯޓް ސްކޮޑްރަން އުފެއްދުމުގެ މަޤްޞަދަކީ ދިވެހިރާއްޖޭގެ ކަނޑުގެ ސަރަޙައްދު ރައްކާތެރިކޮށް، ކަނޑުއަޑީގެ އޮޕަރޭޝަންތައް ހަރުދަނާކޮށް، ޤައުމީ ސަލާމަތާއި ރައްކާތެރިކަން އިތުރަށް ކަށަވަރުކުރުމެވެ.
