ނަޞްރުގެ ދުވަހުގެ މުނާސަބަތުގައި ދިވެހި ސިފައިންގެ އަސްކަރީ ޤާބިލުކަން ދައްކާލުމުގެ ޚާއްޞަ ޙަރަކާތެއް މިއަދު ޖުމްހޫރީ މައިދާނުގައި ކުރިއަށްގެންގޮސްފިއެވެ. "ދިވެހި ސިފައިންގެ އަސްކަރީ ހުށަހެޅުން" ގެ ނަމުގައި ބޭއްވުނު މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒުއެވެ.

މި ޙަރަކާތުގައި ސިފައިންގެ އެކި ވިންގުތަކުގެ އޮޕަރޭޝަންތައް ދައްކާލައި، ނިރުބަވެރި ޙަމަލާއެއް ރޫޅާލުމުގެ އޮޕަރޭޝަނެއް ރާވާ ކުރިއަށްގެންދާނެ ގޮތް ދައްކާލާފައިވެއެވެ. ކޯސްޓް ގާޑް، މެރިން ކޯޕްސް، އެއަރ ކޯޕްސް، ޑިފެންސް އިންޓެލިޖެންސް ސަރވިސް އަދި ސްޕެޝަލް ފޯސަސްގެ ދައުރު މި އޮޕަރޭޝަންގައި ދައްކުވައިދީފައިވެއެވެ.

ޙަރަކާތުގެ އެންމެ ޚާއްޞަ ކަމެއްގެ ގޮތުގައި، ކަނޑުމަތީގައި އަސްކަރިއްޔާގެ ޙަރަކާތްތެރިވުން އިތުރުކޮށް ޚާއްޞަ އޮޕަރޭޝަންތައް ހިންގުމަށް "ސްޕެޝަލް ބޯޓް ސްކޮޑްރަން" އިފްތިތާޙުކޮށްދެއްވާފައިވެއެވެ. މީގެއިތުރުން، ރައީސުލްޖުމްހޫރިއްޔާ ވަނީ ސްޕެޝަލް ބޯޓް ސްކޮޑްރަންގެ އެއްވަނަ ކޮލިފިކޭޝަން ކޯހުގެ ސިފައިންނަށާއި ސްޕެޝަލް ފޯސަސްގެ 5 ވަނަ ކޮލިފިކޭޝަން ކޯސް ފުރިހަމަކުރެއްވި ސިފައިންނަށް ބެރޭ ޙަވާލުކޮށްދެއްވާފައެވެ.

މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ޙިލްމީއާއި ދިފާޢީ ވަޒީރު ޣައްސާން މަޢުމޫނުގެ އިތުރުން ވަޒީރުންނާއި ދައުލަތުގެ އިސްވެރިންނާއި ގިނަ ޢަދަދެއްގެ ޢaންމު ރައްޔިތުން ބައިވެރިވެފައިވެއެވެ. އަދި ސިފައިންގެ ބޭންޑުން ދުވަހާއި ގުޅޭ ލަވަތައްވެސް ހުށަހަޅާދީފައިވެއެވެ.