ގައުމީ އެއްވެސް ރުކުނަކަށް އުނިކަމެއް އަންނާނެ ކަމެއް ނުކުރާނަން: ރައީސް

ދިވެހިރާއްޖޭގެ ސައްތައިން ސައްތަ އިސްލާމީވަންތަކަމާއި މިނިވަންކަން ހިމާޔަތްކުރުމަކީ އެމަނިކުފާނު އަޅުއްވާ ކޮންމެ ފިޔަވަޅަކާއި ނިންމަވާ ކޮންމެ ނިންމެވުމެއްގެ އެންމެ އިސް އަމާޒު ކަމުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

ނަސްރުގެ ދުވަހުގެ ރަސްމީ ޖަލްސާގައި ގައުމާ މުހާތަބުކުރައްވައި ދެއްކެވި ވާހަކަފުޅުގައި، ގައުމީ އެއްވެސް ރުކުނަކަށް ކުޑަވެސް އުނިކަމެއް އަންނާނެ ގޮތަކަށް އެއްވެސް ކަމެއް ނުކުރައްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ދިވެހި ރައްޔިތުންނަށް އެރުވިއެވެ. އަދި ސިޔާސީ ޖަޒުބާތުތަކާއި ޒާތީ އަރާރުންތަކުގެ ކުރިއަށް ގައުމީ އިހްލާސްތެރިކަމާއި ޖަމާއަތުގެ ބާއްޖަވެރިކަން ނެރުމަށް މުޅި ގައުމަށް އެމަނިކުފާނު ގޮވާލެއްވިއެވެ.

ތަގުތީރު ނިންމަވާލައްވަމުން ރައީސުލްޖުމްހޫރިއްޔާ ވިދާޅުވީ، ވެރިކަމުގެ ދަހިވެތިކަމާއި ހަސަދަވެރިކަމުގެ ކުރިއަށް ގައުމީ ސަލާމަތާއި، ފުދުންތެރިކަމާއި، ދިވެހި ކޮންމެ ފަރުދެއްގެ އުފާވެރިކަމަށް ތަންދޭންޖެހޭ ކަމަށާއި، ދަރަނީގެ އަޅުވެތިކަމުން މިންޖުވެ ފުދުންތެރި އުފާވެރި މުސްތަގުބަލަކަށް އަމާޒު ހިފަންޖެހޭ ކަމުގައެވެ.