ނަސްރުގެ ދުވަސް ފާހަގަކުރުމަށް ބާއްވާ އިހުތިފާލުތައް މިއަދުގެ ފަތިސް ނަމާދުން ފަށައިފިއެވެ. އިސްލާމީ މަރުކަޒުގައި އޮތް ޚާއްޞަ ފަތިސް ނަމާދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި ނައިބު ރައީސް ޙުސައިން މުޙައްމަދު ލަޠީފްގެ އިތުރުން ޑިފެންސް މިނިސްޓަރު ޣައްސާން މައުމޫނު ބައިވެރިވެ ވަޑައިގެންނެވިއެވެ.

^{ފޮޓޯ: ރައީސް އޮފީސް}

މި ނަމާދުގައި ސަރުކާރުގެ ވަޒީރުންނާއި ދިވެހި އަސްކަރިއްޔާގެ ގިނަ އަދަދެއްގެ އިސް ބޭފުޅުންވެސް ބައިވެރިވެ ވަޑައިގެންނެވިއެވެ. މީގެ އިތުރުން، ސަރުކާރުގެ އެހެނިހެން އިސްވެރިންވެސް މި ނަމާދުގައި ބައިވެރިވިއެވެ.

އެއަށްފަހު ޛިކުރުކޮށް ނިމި، ޖުމްހޫރީ މައިދާނުގައި ދިދަ ނެގުމުގެ ރަސްމިއްޔާތެއް ބޭއްވުނެވެ.

ނަސްރުގެ ދުވަހަކީ 1988 ވަނަ އަހަރުގެ ނޮވެމްބަރު 3 ވަނަ ދުވަހު ރާއްޖެއަށް ދިން އުދުވާނީ ހަމަލާއިން ޤައުމު ސަލާމަތްކުރުމަށް ޝަހީދުވި ބޭފުޅުންގެ ހަނދާން އާކޮށް، އެ ދުވަހު ދިވެހި ރައްޔިތުންނާއި ސިފައިންގެ ހިތްވަރުން ޤައުމަށް ލިބުނު ނަސްރު ފާހަގަކުރާ ދުވަހެވެ.

^{ފޮޓޯ: ރައީސް އޮފީސް}