ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ރާއްޖޭގެ އެންމެހާ ރައްޔިތުންނަށް 36 ވަނަ ނަޞްރުގެ ދުވަހުގެ ތަހުނިޔާ ފޮނުއްވައިފިއެވެ.
ނަޞްރުގެ ދުވަހާ ގުޅިގެން ރައީސުލްޖުމްހޫރިއްޔާ މީސްމީޑިއާގައި ކުރެއްވި ޕޯސްޓެއްގައި، އެދުވަހު ދިވެހިން ދެއްކި ހިތްވަރާއި އަޒުމް ދޭހަވާ ޅެން ބައިތުތަކެއް ހިއްސާކުރައްވާފައިވެއެވެ. މި ބައިތުތަކުގައި، ދިވެހި އުއްމަތުގެ ހައްޤުގައްޔާއި ދިވެހި ދިދަ ހިމާޔަތް ކުރުމަށް ދިވެހިން އެކުވެ ނިކުތްކަން ފާހަގަކުރައްވާފައިވެއެވެ.
މީގެއިތުރުން، ޤައުމު ދިފާޢު ކުރުމަށް ދިވެހި ލެއިން ޤުރުބާންވި ފަރާތްތަކުގެ ހަނދާންތައް އައުކޮށް، އެ ޝަހީދުންނަށް ދިވެހިން ޝުކުރުވެރިވާ ކަމަށާއި، އެފަރާތްތަކުގެ ޒިކުރާ ދިވެހިން އައު ކުރަން ޖެހޭ ކަމަށް ރައީސުލްޖުމްހޫރިއްޔާ ވިދާޅުވިއެވެ.
3 ނޮވެމްބަރ 1988 ގައި ދިވެހިރާއްޖޭގެ މިނިވަންކަން ނަގާލުމަށް ދެވުނު ޢުދުވާނީ ހަމަލާގައި 19 ދިވެހިން ޝަހީދުވިއެވެ. މީގެ ތެރޭގައި 11 މަދަނީ ރައްޔިތުންނާއި 8 ސިފައިން ހިމެނެއެވެ. މިއަދު ފާހަގަކުރެވެނީ މި ހަމަލާއިން ދިވެހިރާއްޖެ ސަލާމަތްވި ދުވަހުގެ 36 ވަނަ އަހަރީ ދުވަހެވެ.
ނަޞްރުގެ ދުވަހަކީ ދިވެހި ޤައުމިއްޔަތާއި މިނިވަންކަމުގެ މުހިންމުކަން ހަނދާންކޮށްދޭ، އަދި ޤައުމީ އެއްބައިވަންތަކަމުގެ މުހިންމުކަން އަލުން އައުކޮށްދޭ ދުވަހެއްގެ ގޮތުގައި ފާހަގަކުރެވެއެވެ.
