ޚަބަރާއި މަޢުލޫމާތު ފެތުރުމުގައި ނޫސްވެރިން ތެދުވެރި ވުމަށާއި ދޮގު މަޢުލޫމާތު ނުފެތުރުމަށް ރައިސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް އިލްތިމާސް ކުރައްވައިފިއެވެ. ޚާއްޞަކޮށް ހައްސާސް މައްސަލަތަކުގައި ރައްޔިތުންގެ ހިތުގައި ބިރުވެރިކަން އުފެދޭ ގޮތަށާއި އިންސާނީ ކަރާމާތް ގެއްލޭ ގޮތަށް ދޮގު މަޢުލޫމާތު ނުފެތުރުމަށް ނޫސްވެރިންނަށް އިލްތިމާސް ކުރެއްވިއެވެ.

ދޮގު ޚަބަރު ނުފެތުރުމަށް އެދި އިލްތިމާސްކުރައްވަމުން، މީޑިއާ ކައުންސިލްގެ 11 ވަނަ ނޫސްވެރިކަމުގެ އިނާމު ދިނުމުގެ ޙަފްލާގައި އެމަނިކުފާނު ވިދާޅުވީ ނޫސްވެރިންގެ ފަރާތުން ދޮގު ޚަބަރު ފަތުރާތީ ސަރުކާރުން ކަންބޮޑުވާ ކަމެއް ކަމަށާއި، ޒިންމާދާރު ނޫސްވެރިކަމަކީ މުޖުތަމަޢުގެ ހަމަޖެހުމަށާއި ޤައުމުގެ ތަރައްޤީއަށް ކޮންމެހެން ބޭނުންވާ ކަމެއް ކަމަށް ވިދާޅުވިއެވެ.

"ނޫސްވެރިކަމުގެ މިނިވަންކަން އިންތިހާއަށް ފަހިވެފައިވާ މި ދަނޑިވަޅުގައި، ސައްޙަ މަޢުލޫމާތު ފޯރުކޮށްދިނުމަކީ ވަރަށް މުހިންމު ކަމެއް. ޒިންމާދާރު ނޫސްވެރިކަމަކީ މުޖުތަމަޢުގެ ހަމަޖެހުމަށާއި ޤައުމުގެ ތަރައްޤީއަށް ކޮންމެހެން ބޭނުންވާ ކަމެއް،" ނައިބު ރައީސް ވިދާޅުވިއެވެ.

ފަހަކަށް އައިސް ބައެއް މީޑިއާތަކުން ދޮގު މަޢުލޫމާތު ފަތުރަމުންދާކަމާމެދު ސަރުކާރު ކަންބޮޑުވާއިރު، ނައިބު ރައީސް ވަނީ ނޫސްވެރިކަމުގެ ދާއިރާގައި ޒުވާނުން ގިނަވަމުންދާކަމީ އުފާކުރައްވާ ކަމެއްކަމަށް ވިދާޅުވެފައެވެ.