ސިޔާސީ ޕާޓީތަކުގެ ޒިންމާދާރުކަން އިތުރުކޮށް، ޤާނޫނާއި ޚިލާފުވާ ޙާލަތްތައް މަދުކުރުމަށް މިހާރު ރައްޔިތުންގެ މަޖިލީހަށް ހުށަހަޅާފައިވާ އިސްލާޙަކީ މަރުޙަބާ ކިޔަންޖެހޭ ފިޔަވަޅެއް ކަމަށް ސިޔާސީ ދާއިރާގެ މާހިރުން ދެކެއެވެ.
ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ހުށަހަޅާފައިވާ މި އިޞްލާޙުގައި، ޤާނޫނާއި ޚިލާފުވާ ފަރާތްތަކަށް ކުރެވޭ ޖޫރިމަނާގެ އަދަދު ބޮޑުކުރުމާއި، އެ ފަރާތް ނިސްބަތްވާ ޕާޓީއަށްވެސް ޖޫރިޖޫރިމަނާ ކުރެވޭނެ ގޮތް ހަމަޖެއްސުން ހިމެނެއެވެ.
"މި އިޞްލާޙަކީ ސިޔާސީ ޕާޓީތަކުގެ ޒިންމާދާރުކަން އިތުރުކޮށް، ޤާނޫނީ އިމުގެ ތެރެއިން ޙަރަކާތްތެރިވުމަށް ބާރުއަޅާ ފިޔަވަޅެއް. މިއީ ދިވެހިރާއްޖޭގެ ސިޔާސީ މަސްރަޙް އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް،" ސިޔާސީ ކަންކަމުގެ ތަޖުރިބާކާރެއް ކަމަށްވާ އަހުމަދު ނަސީމް ވިދާޅުވިއެވެ.
ސިޔާސީ ޕާޓީތައް އަޑީގައި ތިބެގެން ސަރުކާރަށް ޖެއްސުން ކުރުމުގެ ގޮތުން މަސްވެރިން ލައްވައި މުޒާހަރާކޮށް، މިފްކޯގެ އައްޑޫ ޕްރޮޕަޓީތަކަށް ގެއްލުންދީ އޮޕަރޭޝަންސްތައް ހުއްޓުވާލި - ސިޔާސީ ޕާޓީތަކުން ޤައުމު ހަލަބޮލިކޮށް ގަސްދުގައި ގެއްލުންދިނުމުގެ ގޮތުން ކުރާ ކަންތަކާއިމެދު، އެޕާޓީތައް ހަރުދަނާ ކުރުމަށްޓަކައި ފިޔަވަޅު އެޅެންވާނެ! ބޮޑު ތަނުން ޖޫރިމަނާ ކުރުމަކީ މުހިންމު ކަމެއް! / ފޮޓޯ: ސޯޝަލް މީޑިއާ
މި އިޞްލާޙުގައި ހިމެނޭ އަނެއް މުހިންމު ބަދަލަކީ ސިޔާސީ ޕާޓީތަކަށް ދައުލަތުން ދޭ ފައިސާގެ ޢަދަދު ކަނޑައެޅުމުގައި ގެންނަ ބަދަލެވެ. މިހާރު ހުށަހަޅާފައިވާ ގޮތުން، ދައުލަތުގެ އަހަރީ ބަޖެޓްގައި އެ އަހަރަކަށް ލަފާކުރާ އާމްދަނީގެ 0.1 އާއި 0.2 އާ ދެމެދުގެ އިންސައްތައެއް ޕާޓީތަކަށް ދޫކުރެވޭނެއެވެ.
"މި ބަދަލަކީ ސިޔާސީ ޕާޓީތަކަށް ލިބޭ ފައިސާ އިތުރަށް ހަރުދަނާކޮށް، އެ ފައިސާ ބޭނުންކުރެވޭ ގޮތް ރަނގަޅުކުރުމަށް އެޅޭ ފިޔަވަޅެއް. މިއީ ޕާޓީތަކުގެ މާލީ ހާލަތު ރަނގަޅުކޮށް، އިތުރު ޒިންމާދާރުކަމާއެކު މަސައްކަތްކުރުމަށް ލިބޭ ފުރުސަތެއް،" ނަސީމް އިތުރަށް ވިދާޅުވިއެވެ.
ރައްޔިތުންގެ މަޖިލީހުގެ ޢިއްޒަތްތެރި މެމްބަރު ލަޠީފުގެ ހުށަހެޅުމުގައިވާ ގޮތުން ސިޔާސީ ޕާޓީތަކުގެ ޤާނޫނާއި ޚިލާފުވާ މީހަކު 30،000 ރުފިޔާއާއި 75،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި ކުރިން ޕާޓީ ޖުރިމަނާ ކުރާ ގޮތަށް ޤާނޫނުގައި ކަނޑައަޅާފައި ނެތް އިރު، މިހާރު މިގެންނަ ބަދަލާއެކު އެ ޢަމަލެއް ހިންގި ފަރާތް ނިސްބަތްވާ ޕާޓީއެއް 100،000 ރުފިޔާއިން ޖޫރިމަނާ ކުރެވޭނެ ކަމަށް ހުށަހެޅުމުގައިވެއެވެ.
މި އިޞްލާޙް ފާސްވެއްޖެނަމަ، ސިޔާސީ ޕާޓީތަކުގެ ޙަރަކާތްތައް އިތުރަށް ހަރުދަނާވެ، ޤާނޫނީ އިމުގެ ތެރެއިން މަސައްކަތްކުރުމަށް އިތުރު ބާރެއް ލިބޭއިރު އިދިކޮޅު ސިޔާސީ ފަރާތްތަކުން މާނަކުރަނީ މިއީ އެފަރާތްތަކަށް ކުރާ ޖެއްސުމެއް ކަމަށެވެ.
