ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ސެކްރެޓަރީ ޖެނެރަލް (އެސްޖީ)ގެ މަގާމަށް، ލޯކަލް ގަވަނަންސް މިނިސްޓްރީގެ ސްޓޭޓް މިނިސްޓަރަކަށް ކުރިން ހުންނެވި މޫސާ ފަތުހީ މިއަދު އައްޔަންކޮށްފިއެވެ.

ޕީއެންސީން ވަނީ އެސްޖީގެ މަގާމަށް މޫސާ ފަތުހީ އައްޔަންކުރިކަން އިއުލާނުކޮށް އޭނާއަށް މަރުހަބާ ކިޔައިފައެވެ.

މޫސާ ފަތުހީ މި މަގާމަށް އައްޔަންކޮށްފައި މިވަނީ، ސަރުކާރުގެ އޮނިގަނޑަށް ގެނައި ބަދަލުތަކުގެ ތެރެއިން ލޯކަލް ގަވަނަންސް މިނިސްޓްރީ އުވާލުމާ ގުޅިގެންނެވެ. މީގެ އިތުރުން މޫސާ ފަތުހީ އަކީ ސަރުކާރުގެ ކުންފުނިތަކުގެ ބޯޑުތަކަށް މީހުން ހަމަޖެއްސުމާއި ކުންފުނިތަކާ ބެހޭ އެކި ޒިންމާތަކާ ހަވާލުކޮށްފައި އޮންނަ ޕްރައިވަޓައިޒޭޝަން އެންޑް ކޯޕަރައިޓައިޒޭޝަން (ޕީސީބީ) އަށް ރައީސުލްޖުމްހޫރިއްޔާ އައްޔަން ކުރައްވާފައިވާ ބޭފުޅެއް ވެސް މެއެވެ.

ސިޔާސީ ދާއިރާގައި މޫސާ ފަތުހީ އަކީ ފާހަގަކޮށްލެވޭ ބޭފުޅެކެވެ. އެގޮތުން 2022 ވަނަ އަހަރު ބޭއްވި ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި ޕީޕީއެމްގެ ޓިކެޓުގައި އޭނާ ވަނީ ވާދަކުރައްވައިފައެވެ.

ޕީއެންސީގެ އެސްޖީގެ މަގާމު ހުސްވީ ކުރިން އެ މަގާމުގައި ހުންނެވި މުއާޒް ހަލީމް، މިދިޔަ ހޮނިހިރު ދުވަހު މަގާމުން އިސްތިއުފާ ދެއްވުމާ ގުޅިގެންނެވެ. މުއާޒް އިސްތިއުފާ ދެއްވަމުން ވިދާޅުވީ، ރައްޔިތުންގެ ވިންދާ އެއްގޮތަށް ޕާޓީގެ މަސައްކަތްތައް ބައްޓަންކޮށް، ފުރިހަމަ ނަތީޖާ ނެރޭ ޕާޓީއަކަށް ހަދަން ރައީސް ޑރ. މުހައްމަދު މުއިއްޒު ފައްޓަވާފައިވާ މަސައްކަތްޕުޅުތަކަށް އެއްބާރުލުން ދެއްވަން ބޭނުންވާތީ ކަމަށެވެ.

ލޯކަލް ކައުންސިލްތަކުގެ އިންތިހާބަށް ފަހު ސަރުކާރުގެ ހިންގުމަށް އަންނަނީ ބޮޑެތި ބަދަލުތަކެއް ގެންނަމުންނެވެ. އެގޮތުން ކެބިނެޓުގެ 10 ވަޒީރަކު އިސްތިއުފާ ދެއްވައި، މިނިސްޓްރީތަކުގެ މެންޑޭޓަށް ބަދަލު ގެނެސް، ސަރުކާރުގެ ކުންފުނިތަކުގެ ހިންގުމަށް ވެސް މިހާރު ދަނީ ބަދަލުތައް ގެންނަމުންނެވެ.