ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް 20 އަހަރު ފުރުމާއި ގުޅިގެން އެޕާޓީން ކުރިއަށް ގެންދިއުމަށް ހަމަޖެހިފައިވާ "ރަން ރީނދޫ" ހަރަކާތް އަންނަ އޮގަސްޓް މަހުގެ ފުރަތަމަ ދުވަހު ބޭއްވުމަށް ނިންމައިފި އެވެ.
އެމްޑީޕީން ބުނެފައިވާ ގޮތުގައި މި ހަރަކާތަކީ ހިނގާލުމާއި ދުވުމުގެ ހަރަކާތެކެވެ. އެ ޕާޓީން އެކްސްގައި ހިއްސާކޮށްފައިވާ ޕޯސްޓެއްގައި ބުނެފައި ވަނީ އެ ޕާޓީއަށް 20 އަހަރު ފުރުމާއި ގުޅިގެން ކުރިއަށް ގެންދިއުމަށް ހަމަޖެހިފައިވާ "ރަން ރީނދޫ" ހަރަކާތް އަންނަ އޮގަސްޓް މަހުގެ 1 ވަނަ ދުވަހު ބޭއްވުމަށް ހަމަޖެހިފައިވާ ކަމަށެވެ.
Advertisement
ފާހަގަކޮށްލަންޖެހޭ ގޮތުގައި ރިޔާސީ ޕްރައިމަރީގެ މައްސަލައިގައި މިހާރު ވެސް ޖަގަޑާ ހަދައި އެކި ލީޑަރުންގެ މެދުގައި މައްސަލަތައް ފުނި ޖެހިފައިވާ އެމްޑީޕީން އެންމެ ފުރަތަމަ މި ހަރަކާތް ބޭއްވުމަށް ނިންމާފައި ވަނީ މި ހިނގާ ޖުލައި މަހުގެ 18 ވަނަ ދުވަހުއެވެ. ނަމަވެސް ޕާޓީގެ އެތެރޭގެ ކޯޅުން ބޮޑުވެ މައްސަލަތައް ނުހިނދި، އެ ހަރަކާތް 18 ވަނަ ދުވަހު ބޭއްވޭ ގޮތް ނުވުމުން ދެން ނިންމީ މިނިވަންދުވަހާއި ދިމާކޮށް މިމަހުގެ 25 ވަނަ ދުވަހު އާޓިފިޝަލް ބީޗް ސަރަހައްދުގައި ބާއްވާށެވެ.
އެމްޑީޕީން ބުނެފައި ވަނީ ހއ. ތުރާކުނުން ފެށިގެން އައްޑޫސިޓީއަށް، އަންނަ އަހަރުގެ އޭޕްރީލް މަހުގެ ކުރިން މި ހަރަކާތް ކުރިއަށް ގެންގޮސް ނިންމާލުމަކީ އަމާޒެއް ކަމަށެވެ.
