ސިޔާސީ ޕާޓީތަކުން ގާނޫނުއަސާސީ އާއި ގާނޫނާ ހިލާފަށް ހަރަކާތްތައް ހިންގާ ކަމަށް ތުހުމަތުކޮށް، އެފަދަ ހަރަކާތްތައް ހުއްޓުވަން ގޮވާލައި ސަރުކާރު ހިންގާ ޕީއެންސީގެ ފަރާތުން ރައްޔިތުންގެ މަޖިލީހަށް ގަރާރެއް ހުށަހަޅައި ބަހުސް ކުރަން ފަށައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަަދު ހުށަހެޅުއްވި މި ގަރާރުގައި ވަނީ، ގާނޫނާ ހިލާފު އަމަލުތައް ހިންގާ ފަރާތްތަކަށް ގާނޫނީ ފިޔަވަޅު އެޅުމާ މެދު މެންބަރުން ދެކެވަޑައިގަންަނަވާ ގޮތެއް ބެލުމަށް ހުށަހަޅުއްވާފަ އެވެ.

މި ގަރާރަށް ވާހަކަދައްކަވަމުން މެންބަރު ސައްތާރު ތުހުމަތު ކުރައްވާ ގޮތުގައި، ސިޔާސީ ޕާޓީތަކުން ގާނޫނާ ހިލާފަށް ހިންގާ ހަރަކާތްތަކުގެ ސަބަބުން ރައްޔިތުންނަށް ދަތިތަކާ ކުރިމަތިވެ، މުޖުތަމައުގެ އަމަން އަމާންކަން ދަނީ ގެއްލެމުންނެވެ. ގަރާރު ހުށަހަޅުއްވަމުން އޭނާ ވިދާޅުވީ ހިޔާލުފާޅުކުރުމާއި ޕާޓީތައް ހިންގުމުގެ ހައްގު ގާނޫނުއަސާސީން ކަށަވަރު ކޮށްދީފައިވީ ނަމަވެސް، އަނެކުންގެ ހައްގުތަކަށް އިހުތިރާމް ކުރުމަކީ ރައްޔިތުންގެ މަސްއޫލިއްޔަތެއް ކަމަށެވެ.

މި ގަރާރު މަޖިލިހަށް ހުށަހެޅިއިރު، ކުރީގެ ރައީސް އަބްދުﷲ ޔާމީން އިސްވެ ހުންނަވައި އުފެއްދެވި ޕީއެންއެފުން އާޓިފިޝަލް ބީޗް ސަރަހައްދުގައި ކޮންމެ ރެއަކު އިހުތިޖާޖު ކުރަމުންދާ މައްސަލަ ވަނީ ފާހަގަވެފަ އެވެ. އަދި އެ ސަރަހައްދުގައި ހުންނަ ޕީއެންސީގެ ޖަގަހައިގައި ޖަލްސާތައް ބާއްވާ ވަގުތުތަކުގައި ޕީއެންއެފްގެ ސަޕޯޓަރުން އެއްވެ އަޑުގަދަކޮށް، ހުރަސްއަޅާ ކަމުގެ ޝަކުވާތައް ވެސް ވަނީ ބޮޑުވެފަ އެވެ.

އިލެކްޝަންސް ކޮމިޝަނުން (އީސީ) ރޭ ނެރުނު ބަޔާނެއްގައި ވެސް ވަނީ ޕީއެންއެފުން ގާނޫނީ އިމުގެ ބޭރުން މުޒާހަރާތަކާއި އެއްވުންތައް ތަކުރާރުކޮށް ބާއްވަމުންދާ ކަމުގެ މައުލޫމާތު ލިބޭ ކަމަށް ބުނެފަ އެވެ. އަދި އެހެން ޕާޓީތަކުގެ ހަރަކާތްތަކަށް ހުރަސްއެޅޭ ގޮތަށް އަމަލު ކުރާ ނަމަ ފިޔަވަޅު އަޅާނެ ކަމުގެ އިންޒާރު ވެސް ކޮމިޝަނުން ވަނީ ދީފަ އެވެ.

އީސީގެ ބަޔާނުގައި ބަޔާންކޮށްފައިވާ ގޮތުގައި، ގާނޫނަކުން ހުއްދަކުރާ ދާއިރާއިން ބޭރުގައި މަގުތަކާއި އާންމު މައިދާންތަކުގައި ސިޔާސީ ހަރަކާތްތައް ބޭއްވުމަކީ ސިޔާސީ ޕާޓީތަކުން އަމަލުކުރަންޖެހޭ ސުލޫކީ މިންގަނޑާ ހިލާފު ކަމެކެވެ. ހާއްސަކޮށް އެއް ޕާޓީއަކުން ބައްދަލުވުމެއް ބާއްވަމުންދާ ތަނެއްގައި، އެހެން ޕާޓީއަކުން ހުރަސްއެޅުމަކީ ގާނޫނީ ގޮތުން މަނާ ކަމެއް ކަމަށް އީސީން ފާހަގަކުރެ އެވެ.

މަޖިލީހަށް ހުށަހެޅި މި ގަރާރުގައި، ސިޔާސީ ޕާޓީތަކުން ހިންގާ ގާނޫނާ ހިލާފު އަމަލުތައް ހުއްޓުވުމަށް ދައުލަތުގެ ކަމާބެހޭ އިދާރާތަކުން އަވަސް ފިޔަވަޅުތަކެއް އެޅުމަށް ވަނީ ގޮވާލާފަ އެވެ.