ޣައްޒާއަށް އަރައި ހަނގުރާމަ ކުރަމުންދާ ޔަހޫދީ ލަޝްކަރަށް މުޖާހިދުން ދިން ޙަމަލާތަކުގައި ރޭ 4 އިޒްރޭލު ސިފައިން މަރާލައިފި ކަމަށް މަސްދަރުތަކުން ބުނެފިއެވެ. އިސްރާއީލުން ވެސް އެކަން ޔަޤީން ކޮށްދީފިއެވެ.

އިސްރާއީލްގެ އަސްކަރިއްޔާއިން ރޭ ބުނެފައިވާ ގޮތުގައި ފަލަސްތީނުގެ ޣައްޒާގައި ހިންގަމުންދާ ހަނގުރާމައިގައި އިސްރާއީލްގެ ހަތަރު ސިފައިން މަރުވެފައިވަނީ ޣައްޒާގެ އުތުރުގައި އޮންނަ ޖަބަލިއާ ސަރަހައްދުގައި ހަނގުރާމަ ކުރަމުންދަނިކޮށް ހަމާސްގެ މުޖާހިދުން ދިން ހަމަލާއެއްގައެވެ.

މަރުވި ސިފައިންގެ ތެރޭގައި ހިމެނެނީ:

1. ކެޕްޓަން ޔެހޮނޮތަން ޖޮނީ ކެރެން (22 އަހަރު)

2. ސްޓާފް ސާޖަންޓް ނިސިމް މޭތަލް (20 އަހަރު)

3. ސްޓާފް ސާޖަންޓް އަވީވް ގިލްބާއޯ

4. ސްޓާފް ސާޖަންޓް ނާއޯރް ހައިމޯވް (22 އަހަރު)

އިސްރާއީލްގެ އަސްކަރިއްޔާއިން މި ސިފައިންގެ ވަނަވަރު އާންމުކޮށްފައިވީ ނަމަވެސް، އެމީހުން މަރުވީ ހަމާސްއިން ދިން ކޮން ބާވަތެއްގެ ހަމަލާއެއްގައިކަން ސާފުކޮށްދީފައެއް ނުވެއެވެ.

ނަމަވެސް މުޖާހިދުންނާއި ޙަވާލާދީ ޚަބަރުތައް ބުނާގޮތުގައި ރޭ ނަބްލޫސްގެ އިރުމަތީގައި އޮންނަ ބަލަތާއަލްބަލަދޫއަށް ބުލްޑޯޒަރުތަކުން އިޒްރޭލް ސިފައިން އަރައިގަތް ވަގުތު ގޮވާތަކެތި ބޭނުންކޮށްގެން މުޖާހިދުން ޙަމަލާ ދިނެވެ.

ފަލަސްތީނުގެ މިނިވަންކަމަށް ޖިހާދުކުރާ މުޖާހިދުންނަކަށް ޤައުމުތަކުން ހަތިޔާރެއް ނުލިބެއެވެ. ނަމަވެސް އެކި ގޮތްގޮތުން ސާމާނުތައް ހޯދައިގެން އެމީހުން އަމިއްލަޔަށް ހަތިޔާރުތައް އުފައްދައެވެ.

މި ހަތަރު ސިފައިން މަރުވުމާއެކު، ޣައްޒާގައި ކުރަމުންދާ ހަނގުރާމައިގައި މަރުވި އިސްރާއީލް ސިފައިންގެ އަދަދު ވަނީ 367 އަށް އަރާފައެވެ.

ޖަބަލިއާ ސަރަހައްދަކީ މިދުވަސްކޮޅު އިސްރާއީލްގެ ސިފައިން އެންމެ ވަރުގަދައަށް ޙަމަލާތައް ދެމުން އަންނަ އެއް ދިމާލެވެ.