ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ އަޙްމަދު ސަޢީދުގެ ޕާސްޕޯޓު، ކޮރަޕްޝަންގެ މައްސަލައަކާ ގުޅިގެން ހިފަހައްޓައިފިއެވެ. އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާ ގުޅިގެން އަޙްމަދު ސަޢީދުގެ ޕާސްޕޯޓު ހިފެހެއްޓީ މި މަހުގެ 9 ވަނަ ދުވަހުއެވެ.

ފެނަކަ ކޯޕަރޭޝަންގައި ހިނގާފައިވާ ކަމަށް ތުހުމަތުކުރެވޭ ކޮރަޕްޝަންގެ މައްސަލަތައް ބެލުމަށް މި ސަރުކާރުން ވަނީ އޭސީސީއަށް ހުށަހަޅާފައެވެ. މި ސަރުކާރު ވެރިކަމާއި ޙަވާލުވެ ސަރުކާރުގެ ކުންފުނިތައް އޮޑިޓްކުރުމުގެ ތެރެއިން ފެނަކަ ކޯޕަރޭޝަނުން ކޮރަޕްޝަންގެ ބޮޑެތި ކަންތައްތަކެއް ހިންގައި، އެ ކުންފުނި ވަނީ 1.7 ބިލިއަން ރުފިޔާއިން ދަރުވާލައިފައި އޮތްކަން އެނގުނެވެ.

އަޙްމަދު ސަޢީދުގެ މައްޗަށް ތުހުމަތު ކުރެވެނީ، ކުންފުނި ހިންގުމުގައި މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމުގެ މައްސަލަތަކާއި، އުޞޫލުން ބޭރުން މީހުންނަށް ވަޒީފާ ދިނުމާއި، ކުންފުނީގެ ޕްރޮކިއުމަންޓް އުޞޫލުތަކާއި ޚިލާފުވުމާއި، އުޞޫލުތަކާ ޚިލާފަށް ކުންފުނިން ފައިސާ ދޫކުރި މައްސަލަތަކެވެ.

އޭސީސީން ވަނީ ފެނަކައިގެ މައްސަލަތައް ބަލައި 20,504,491.54 ރުފިޔާ އަނބުރާ ހޯދަން އެ ކުންފުންޏަށް އަންގާފައެވެ. އަދި ބެލި މައްސަލަތަކުގެ ތެރެއިން 92 ކަމެއް އިޞްލާޙުކުރުމަށް އޭސީސީން ވަނީ ފެނަކައަށް އަންގާފައިކަން ވެސް ފާހަގަ ކުރެވެއެވެ.

މި ސަރުކާރުން ވަނީ ފެނަކައިގެ ދަރަނީގެ ތެރެއިން 300 މިލިއަން ރުފިޔާ ދައްކާފައެވެ. ފެނަކައިގެ ހިންގުން ރަނގަޅުކޮށް މި އަހަރުގެ ދެވަނަ ކުއާޓަރުގައި އެ ކުންފުންޏަށް ހަތް މިލިއަން ރުފިޔާ ފައިދާ ވެފައިވާކަން ފާހަގަ ކުރެވެއެވެ. އަދި ފައިސާ ދޫކޮށް ޚަލާސްކުރި ފަރާތްތަކުގެ ތެރޭގައި 278 ވެންޑަރުން ހިމެނޭ ކަމަށް ވެސް ފެނަކައިން ވަނީ ބުނެފައެވެ.