ޣައްޒާގެ އުތުރުގެ އަވަށެއް ކަމަށްވާ ބެއިތުލަހިޔާގެ ޢާންމުން ދިރިއުޅޭ ޢިމާރާތްތަކަކަށް އިޒްރޭލުން ދިން ވައިގެ ޙަމަލާތަކުގައި ފަލަސްތީނުން މިއަދު ޝަހީދުވި މީހުންގެ ޢަދަދު 100އާއި ކައިރިކޮށްފި ކަމަށް މަސްދަރުތަކުން ބުނެފިއެވެ.
ބައެއް މަސްދަރުތަކުން ބުނާ ގޮޮތުގައި 93 މީހުން ޝަހީދުވިއެވެ. މި ޙަމަލާތަކުގައި ގިނަ އަދަދެއްގެ ކުޑަކުދިން ހިމެނޭ ކަމަށް ޣައްޒާގެ ހެލްތް މިނިސްޓްރީން ބުނެއެވެ.
އިސްރާއީލުން ވަނީ 200 އެއްހާ މީހުން ދިރިއުޅޭ ޢިމާރާތަކަށް އަމާޒުކޮށް މިސައިލް ޙަމަލާދީ މުޅި ޢިމާރާތް ފުނޑުފުނޑު ކޮށްފައި ކަމަށާ ޝަހީދުވި މީހުންގެ ތެރޭގައި އިއްޔެ އެ ސަރަޙައްދަށް ހިޖުރަކުރި ބައެއް މީހުން ހިމެނޭ ކަމަށްވެސް ރިޕޯޓުތައް ބުނެއެވެ.
Advertisement
ހެލްތް މިނިސްޓްރީން ބުނެފައިވަނީ ޙަމަލާގެ ސަބަބުން ގިނަ ބަޔަކު އަދިވެސް ތިބީ ޢިމާރާތުގެ ކުނިތަކުގެތެރޭގައި ތާށިވެފައި ކަމަށާއި، އެމްބިއުލާންސްތަކާއި ސިވިލް ޑިފެންސް ކްރޫތަކަށް އެ މީހުންނާ ހަމައަށް ނުދެވޭ ކަމަށެވެ. އަދި ޒަޚަމްވި މީހުންނަށް ފަރުވާ ނުދެވުނީ ކައިރީގައި ހުރި ކަމަލް އަދްވާން ހޮސްޕިޓަލް ހުސްކުރަން ޑޮކްޓަރުންނަށް މަޖުބޫރުވެފައިވާތީ ކަމަށްވެސް ރިޕޯޓުތައް ބުނެއެވެ.
އިޒްރޭލުން ޣައްޒާގެ އުތުރުގެ ސަރަޙައްދު ވަށާލައި ބޮން އަޅާތާ މިއަދަށް 25 ދުވަސް ވެފައިވާ އިރު، އެ ސަރަހައްދުގައި ގާތްގަނޑަކަށް ލައްކައެއްހާ މީހުން ތާށިވެފައި ތިބި ކަމަށް ބެލެވެއެވެ. މެޑިކަލް ނުވަތަ ކާބޯތަކެތީގެ ސާމާނު އެ ސަރަޙައްދުގައި ނެތް އިރު، އެހީގެ ތަކެތި ގެނައުމަށް އިޒްރޭލު ސިފައިން ދެކޮޅު ހަދަމުން އަންނަތާ ހަފްތާތަކެއް ވެއްޖެއެވެ.
މި ވޭތުވެދިޔަ އަހަރު ދުވަހުގެ ތެރޭގައި ޣައްޒާއިން ޝަހީދުވި މީހުންގެ ޖުމްލަ އަދަދު 43،020 އަށް އަރާފައިވާ އިރު، އޭގެތެރެއިން 16،750 އަކީ ކުޑަކުދިންނެވެ. އަދި 10،000 އަށްވުރެ ގިނަ މީހުންގެ ހަށިތައް ވެއްޓިފައިވާ ޢިމާރާތްތަކުގެ ދަށުގައި އެބަތިބި ކަމަށް ވެސް ރިޕޯޓުތައް ބުނެއެވެ
