ޕްރިމިއަރ ލީގުގައި މެންޗެސްޓާ ޔުނައިޓެޑް 9 މެޗު ކުޅުނުއިރު ލިބިފައިވަީ އެންމެ 11 ޕޮއިންޓެވެ. ތާވަލުގައި އޮތީ 14 ވަނައިގައެވެ. މިހުރިހާކަމެއް މިހެން އޮއްވާ އާދީއްތަ ދުވަހު ކޯޗު ޓެން ހަގް ބޭރުކޮށްލައިފިއެވެ. މިއީ ފަހަކަށް އައިސް މެންޔޫއަށް ދިމާވާ ބޮޑު ސިހުރެކެވެ. އެއްވެސް ކޯޗެއް ހަރެއް ނުލައެވެ. ވޭތުވެދިޔަ ފަސް ސީޒަނުގައި މެންޗެސްޓާ ޔުނައިޓެޑުގެ ކޯޗުކަމުގެ ސިލްސިލާގައި މި ސިހުރު އެކުލެވިގެންވާ ކަމަށް ބުނެވެއެވެ. 2016 ވަނަ އަހަރުގެ މެއި މަހުން ފެށިގެން ކޯޗުގެ މަގާމުގައި ހުރި ހޯސޭ މޮރީނިއޯ ތިން އަހަރުގެ ކޮންޓްރެކްޓެއްގައި ސޮއިކުރި ނަމަވެސް 2018 ވަނަ އަހަރުގެ ޑިސެމްބަރު މަހު އޭނާ މަޤާމުން ވަކިކުރިއިރު ބާކީ ހަ މަސް އޮތެވެ. އޭނާގެ ފަހަތުން 2019 ވަނަ އަހަރުގެ މާޗް މަހު ތިން އަހަރުގެ އެއްބަސްވުމެއްގައި ސޮއި ކުރުމުގެ ކުރިން ފުރަތަމަ ވަގުތީ ގޮތުން ހަވާލުވި ސޮލްޝެއާ ވަނީ ކޮންޓްރެކްޓްގެ ދެ އަހަރާއި ބައި ފުރިހަމަކޮށް 2021 ވަނަ އަހަރުގެ ނޮވެމްބަރު މަހު މަޤާމުން ވަކިކޮށްފަ އެވެ. އެއަށްފަހު 2021-2022 ވަނަ އަހަރުގެ ސީޒަން ނިމެންދެން ވަގުތީ ގޮތުން ކޯޗުކަމާ ހަވާލުވީ ރެންގްނިކް އެވެ. އެރިކް ޓެން ހެގް އައްޔަން ކުރީ 2022 ވަނަ އަހަރުގެ އޭޕްރީލް މަހު ތިން އަހަރުގެ ކޮންޓްރެކްޓެއްގެ ދަށުން އިތުރު އަހަރެއްގެ އޮޕްޝަނަކާ ވެސް އެކު އެވެ. ނަމަވެސް ތިން ވަނަ ސީޒަނުގައި އޭނާ މަޤާމުން ވަކިކުރުމުން ފުރަތަމަ އެއްބަސްވުމުގެ ފުރިހަމަ އަހަރެއްހާ ދުވަސް ފުރިހަމަ ނުވެ އެބައޮތެވެ. 
ޓެން ހަގް ބޭރުކުރަން ޖެހުނު އެންމެ ބޮޑު މައްސަލައަކީ ޓީމުގެ ކުޅުމުގެ ސްޓައިލެއް ނެތުމެވެ. ޔުނައިޓެޑްގެ ޑީއެންއޭ އާއި އާ އުސޫލެއްގެ ވާހަކަ ދެއްކި ނަމަވެސް، ޓެން ހަގްގެ ޓީމު ފެނުނީ ގުޅުން ކެނޑިފައިވާ ގޮތަކަށެވެ. ޓެންހަގް ބުނެގެން ޔުނައިޓެޑްގެ ޑިފެންސަށް 260 މިިއަން ޕައުންޑް ޚަރަދުކުރިއެވެ. ނަމަވެސް ފެންނަނީ ރޫޅިފައިވާ އަދި އެހެން ޑިޕާޓްމަންޓުތަކާއި ގުޅުމެއް ނެތް ޑިފެންސްލައިނެކެވެ. ޑިފެންސަށް ބާރު ބޮޑުވެ އޮގަނައިޒް ކަމެއް ނެތުމުގެ ސަބަބުން އިދިކޮޅު ޓީމަށް ގޯލްޖަހާނެ މާ ގިނަ ފުރުސަތުތަކެއް ލިބުމެވެ. ގެޕްތައް ކަވަރު ކުރަން އުނދަގޫވި މިޑްފީލްޑަކާއި ކޯޑިނޭޓް ޕްރެސިން ސްޓްރެޓެޖީއެއް ނެތުމެވެ.
ޓްރާންސްފާ ނިންމުންތަކުން ވެސް ޓެން ހަގް ބޭރުކޮށްލުމުގައި މުހިންމު ދައުރެއް އަދާކުރި އެވެ. އެ ކްލަބުން ބޮޑު ޚަރަދެއް ކުރިއިރު، މުހިއްމު ބައެއް ކުޅުންތެރިންނަށް ލިބުނު އުންމީދުތަކާ އެއްވަރަށް ކުޅެވޭ ގޮތެއް ނުވި އެވެ. މޭސަން މައުންޓްގެ އަނިޔާގެ މައްސަލަތަކާއި، ގޯލްގައި އަންދްރޭ އޮނާނާގެ މިކްސްޑް ފޯމާއި، ޕްރިމިއާ ލީގުގެ ފިޒިކަލް ޑިމާންޑްތަކަށް އެންޓޯނީއަށް އެޑެޕްޓް ނުވެވުނުކަން މެނޭޖްމެންޓުން ފާހަގަކުރެއެވެ. ސްކައި ސްޕޯޓްސްގައިވާ ދިހަވަރަކަށް ޕޭޖުގެ ދިގު އާޓިކަލްގައި މިވާހަކަތައް ލިޔެފައި އެބަހުއްޓެވެ.
Advertisement
އެ ރިޕޯޓުގައި އިތުރަށް ބުނަނީ، ރަސްމުސް ހޮޖްލަންޑް އާއި އެލެޖެންޑްރޯ ގާނާޗޯ ފަދަ ޒުވާން ހުނަރުވެރިން ގޮވައިގެން ޓެން ހަގް އަށް ކާމިޔާބު ހޯދުމަށް ޕްރެޝަރު ކުރިމަތިވި ކަމަށާއި، ސީނިއާ ބައެއް ކުޅުންތެރިންނާ އެކު ޓެން ހަގްގެ ގުޅުން ގޯސްވިއިރު، އޭގެ ކުރީކޮޅު ކްރިސްޓިއާނޯ ރޮނާލްޑޯ އާއި މައްސަލަަ ޖެހުމާއި އަދި ފަހުން މާކަސް ރަޝްފޯޑްގެ ފޯމް ވަރަށް ބޮޑަށް ދަށްވާން ޖެހުނު މައްސަލައެވެ. ޖުލައި 2021 ގައި ބޮރޫޝިއާ ޑޯޓްމުންޑުން ގެނައި ޖޭޑަން ސަންޗޯގެ ވިސްނުމާ ގުޅޭ މައްސަލަތަކުގެ ސަބަބުން ކަންކަން އިތުރަށް ގޯސްވެ މެނޭޖަރުގެ ގާބިލްކަމާ މެދު ކަންބޮޑުވުންތައް އުފެދުނެވެ.
ކަރަބައޯ ކަޕް މޮޅާއި އެފްއޭ ކަޕްގެ ފައިނަލުގައި ކުޅުން ފަދަ ކާމިޔާބީގެ މައްޗަށް ބިނާކޮށް ވެސް އޭނާ ބަހައްޓަން އުނދަގޫވީ ފަހުން މާބޮޑެތި ކަންތައްތައް ފެނި ހަޖަމު ނުވެގެންނެވެ. މިސާލަކަށް ލިވަޕޫލް އަތުން 7-0 އިން ބަލިވުމާއި ޓޮޓެންހަމް އަތުން އަމިއްލަ ދަނޑުގައި ބަލިވި މެޗު ހިމެނެއެވެ. ޓެން ހެގް އަށް އަނިޔާތަކާއި ކުރިމަތިލާން ޖެހުނަސް ޓެކްޓިކަލް ގޮތެއް އޭނާގެ ފަރާތުން ނުފެނެއެވެ. އިނގިރޭސި މީޑިއާތަކުގެ އެންމެ ފަހުގެ ސްޓްރޯއަކީ ނަތީޖާތަކާއި ކުޅުމުގެ ތަފާތު ކަމެވެ. ޕްރިމިއާ ލީގުގައި ޔުނައިޓެޑަށް އުނދަގޫތަކެއް ކުރިމަތިވެ، ޔޫރަޕްގައި ވެސް ލަދުގަންނަ ނަތީޖާތަކާއި ކުރިމަތިވުމުން، ޓެން ހެގް ވަކިކުރަން ނިންމުމަކީ ކޮންމެހެން ކުރަންޖެހޭ ކަމެއް ކަމަށް ވެސް ބަޔާންތަކުގައި ބުނެއެވެ.
މިއީ ޔުނައިޓެޑަށް މިހާރު ދިމމާވެފައިވާ ޙާލަތެވެ. އެއް ޒަމާނެއްގައި ޔުނައިޓެޑު އޮތީ ޔޫރަޕްގެ ފުޓްބޯޅައިގެ އެންމެ ވަރުގަދަ ބާރުގެ ގޮތުގައެވެ. ސާ އެލެކްސް ފަރްގަސަންގެ އިރުޝާދުގެ ދަށުން ދެ ފަހަރެއްގެ މަތިން ޗެމްޕިއަންސް ލީގު ހޯދިއިރު، 1999 ވަނަ އަހަރު ކާމިޔާބު ސީޒަނާއެކު، އަނެއްކާވެސް 2008 ވަނަ އަހަރު ހުނަރުވެރި ސްކޮޑަކާއެކު ޔޫރަޕް ފަތަހަކުރި އެވެ. ޕްރިމިއާ ލީގުގައި ރެޑް ޑެވިލްސް ޑޮމިނޭޓްކޮށް، 1993 އާއި 2013 އާ ދެމެދު 13 ތަށި ހޯދިއެވެ. 2008 އިން 2011 އަށް ހަތަރު ސީޒަނުގައި ތިން ފަހަރު ޗެމްޕިއަންސް ލީގުގެ ފައިނަލަށް ދަތުރުކުރި އެވެ. އެއް ޒަމާނެއްގައި ބާރުގަދަ ކްލަބަށް މިހާރު ކުރިމަތިލާން ޖެހިފައި މިވަނީ "ނުބައި ސިހުރަކާއެވެ."
