މާލެ ސަރަޙައްދުން ފްލެޓް ދޫކުރުމަށް ޢިއުލާނުކުރި "ގެދޮރުވެރިޔާ" ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓު އާންމު ކުރުން ނޮވެމްބަރަށް ފަސްކޮށްފިއެވެ.

މީގެ ކުރިން ހައުސިންގ މިނިސްޓްރީން ބުނެފައިވަނީ މި ހިނގާ އޮކްޓޯބަރު މަހުގެ ތެރޭގައި ފްލެޓް ލިސްޓު އާންމުކުރާނެ ކަމަށެވެ.

ނަމަވެސް އެ މިނިސްޓްރީން މިއަދު ނެރުނު ނޫސްބަޔާނެއްގައި ބުނީ މާލެ ސަރަޙައްދުން ފްލެޓް ދޫކުރުމަށް 22 ޖޫން 2022 ގައި ފަށާފައިވާ "ގެދޮރުވެރިޔާ" ސްކީމްގެ ދަށުން 15 ނޮވެމްބަރު 2023 ގައި ޢިއުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓު އެކުލަވާލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަން ކޮމިޝަނަށް ހުށަހަޅާފައިވާ މައްސަލައާއި ގުޅިގެން ރައީސުލްޖުމްހޫރިއްޔާގެ ލަފާފުޅުގެ މަތިން އެކުލަވާލެވުނު "ހައުސިންގ އެޑްވައިޒަރީ ކޮމިޓީ" އާއި މާލެ ސިޓީ ކައުންސިލުން އެކުލަވާލި "ހައުސިންގ ކޮންސަލްޓެޓިވް ކޮމިޓީ" އަށްވެސް "ގެދޮރުވެރިޔާ" ސްކީމުގެ ދަށުން 15 ނޮވެމްބަރު 2023 ގައި ޢިއުލާނުކުރި ދާއިމީ ލިސްޓު އެކުލަވާލާފައިވާ ގޮތް ރަނގަޅުކަމަށް ނުފެންނާތީ، މި ސްކީމުގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ-އިވެލުއޭޓްކުރުމުގެ މަސައްކަތް އެ މިނިސްޓްރީން ކުރަމުން އަންނަ ކަމަށެވެ.

މިނިސްޓްރީން ބުނީ މި މަސައްކަތްތައް ނިންމުމަށް އިތުރު ވަގުތު ބޭނުންވާތީ، މި އަހަރުގެ ނޮވެމްބަރު މަހުގެ ދެވަނަ ހަފްތާގެ ނިޔަލަށް ވަގުތީ ލިސްޓު ޢާންމުކުރުމުގެ މަސައްކަތްތައް މިނިސްޓްރީން ކުރަމުން އަންނަ ކަމަށެވެ.

ގެދޮރުވެރިޔާ ސްކީމްގެ ދަށުން ހުޅުމާލެ ދެވަނަ ފިޔަވަހީގައި އަންނަނީ 17-18 ބުރީގެ 32 ޓަވަރު އިމާރާތްކުރަމުންނެވެ. ކޮންމެ ފްލޯއެއްގައި އަށް އެޕާޓްމެންޓް ހުންނާނެ އެވެ. އޭގެ ތެރޭގައި ދެ ކޮޓަރީގެ 1,200 ފްލެޓާއި ތިން ކޮޓަރީގެ 2,800 ފްލެޓް ހިމެނެއެވެ.

އެ ހުރިހާ ޓަވަރެއްގެ މަސައްކަތް އަންނަ އަހަރުގެ މެދުތެރެއަށް ނިމޭނެ ކަމަށް، އެ ފްލެޓުތައް ހަދަމުން އަންނަ ފަހި ދިރިއުޅުން ކޯޕަރޭޝަން (އެފްޑީސީ) އިން ވަނީ ބުނެފައެވެ. އޭގެ ތެރެއިން 700 ފްލެޓު ނިންމުމަށް ފަހު މިހާރު ސަރުކާރާ ވަނީ ހަވާލުވެސް ކޮށްފައެވެ.