ގެދޮރުވެރިޔާ ސްކީމަށް ކުރިމަތިލި މީހުންގެ ތެރެއިން 76 ޕޮއިންޓް ލިބުނު ނަމަވެސް ފްލެޓް އެލޮކޭޝަން ނަހަދާ ހުރި 330 މީހަކަށް 3 ކޮޓަރީގެ ފްލެޓް ދޭން ނިންމާފައިވާކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

ރައީސް އޮފިހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މުއްތަލިބު ވިދާޅުވީ ފްލެޓަށް އެދި ހުށަހެޅި މީހުންގެ ތެރެއިން 76 ޕޮއިންޓް އަދި އެއަށްވުރެ މަތިން ޕޮއިންޓް ލިބުނު މީހުން ތިއްބާ އެމީހުންނަށް ފްލެޓް އެލޮކޭޝަން ނުހަދައި 75 ޕޮއިންޓް ލިބުނު ބަޔަކާއެކު އެގްރީމަންޓް ހަދައި ތިން ކޮޓަރީގެ ފްލެޓް ދިން މައްސަލައެއް މިފަހުން ފެންމަތިވެފައިވާ ކަމަށެެވެ. އެގޮތުން އެފަދަ 315 މީހަކަށް ފްލެޓް ދީފައިވާކަމަށާއި އެހެންވެ އިންސާފަށް އަމަލުކުރުމަށް އެ އެއްމެންގެ ފްލެޓް ނަމްބަރުތައް ކެންސަލްކޮށްފައިވާނެ ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ 75 ޕޮއިންޓް ލިބުނު ފަރާތްތަކަށް ފްލެޓް އެލޮކޭޓް ކުރާނީ އެއަށްވުރެ މަތިން ޕޮއިންޓް ލިބުނު ފަރާތްތަކަށް ފްލެޓު ދިނުމަށްފަހު ބާކީވާ ފްލެޓުތަކުން ކަމަށާއި އެގޮތަށް ހަދަން ބަލާއިރު ފްލެޓް ނަންބަރު ކެންސަލްކުރި 315 މީހުންނަށް 3 ކޮޓަރީގެ ފްލެޓު ހަމަނުވާ ކަމަށެވެ. އެހެންވެ އެމީހުންނަށް ފްލެޓު ދޭނީ ގުރުއަތުން ކަމަށާއި ގުރުލައިގެން ނުހޮވޭ މީހުންނަށް ދެކޮޓަރީގެ ފްލެޓް ދެވޭނެ ކަމަށްވެސް ވިދާޅުވި އެވެ.

"އަޅުގަނޑުމެން ޔަގީންކޮށްދޭން ބޭނުންވަނީ އަސާސީ ޝަރުތު ހަމަވެ، އޭރު އެފްޑީސީއާއެކު ސޮއިކޮށްފައިވާ ހުރިހާ ފަރާތްތަކަށްވެސް ފުރުސަތު ދެވޭނެކަން، ތިން ކޮޓަރި ނުދެވިއްޖެނަމަ ދެ ކޮޓަރީގެ އެޕާޓްމަންޓުވެސް ލިބޭނެ." މުއްތަލިބު ވިދާޅުވި އެވެ.

ގެދޮރުވެރިޔާގެ މަޝްރޫއުގެ ދަށުން ފްލެޓް ލިބެނީ 73 ޕޮއިންޓަށްވުރެ މަތިން މާކްސް ލިބިގެންނެވެ. އެ ސްކީމަށް ހުޅުވާލުމުން ކުރިމަތިލި މީހުންގެތެރެއިން 1،218 މީހަކު ޝަރުތު ހަމަވާކަމަށް އޭރު ސަރުކާރުން އާއްމުކުރި ލިސްޓުގައި ވެ އެވެ. އޭގެތެރެއިން ގުރުއަތު ނަގައި ފްލެޓް ނަންބަރު އެލޮކޭޓް ކުރީ 1،160 މީހަކަށެވެ. ބާކީ 58 މީހަކަށް ފްލެޓް އެލޮކޭޓެއް ނުކުރެ އެވެ.

މުއްތަލިބު ވިދާޅުވިގޮތުގައި އޭރު އިއުލާނުކުރި ފްލެޓު ލިސްޓުގައި ނެތް އެއްވެސް މީހަކަށް މި ސަރުކާރުން ފްލެޓް ދީފައިނުވާނެ އެވެ. އަދި ފައިނަލް ލިސްޓު އިއުލާނުކޮށްފައި އޮތުމުން ޕޮއިންޓް ލިބިފައިވަނީ ކިހިނެއްތޯ ނުބައްލަވާ ކަމަށާއި ނަމަވެސް އަސާސީ ޝަރުތުތައް ހަމަވޭތޯ ބަލައި އެ ޝަރުތުތައް ހަމަނުވާ ފަރާތްތަށް ލިސްޓުން އުނިކޮށްފައިވާނެކަމަށްވެސް ވިދާޅުވި އެވެ.