އިޖްތިމާއީ ބޯހިޔާވަހިކަމުގެ މަޝްރޫއުތަކުން ދީފައިވާ ފްލެޓުތައް ކުއްޔަށް ދޫކުރާނަމަ އެއްބަސްވުންތައް ބާތިލުކޮށް ދައުލަތަށް އެފަދަ ތަންތަން ނެގުމަށް ކުރަންޖެހޭ މަސައްކަތްތައް ކުރަމުން އަންނަކަމަށް ހައުސިން އެންޑް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
އިޖްތިމާއީ ބޯހިޔާވަހިކަމަށް ދޫކުރާ ފްލެޓުތަކަށް އެތައް ބަޔަކު އެދިއެދި ތިބޭއިރު އެފަދަ ތަންތަން ލިބޭ މީހުން ބޮޑު އަގުގައި ތަން ކުއްޔަށް ދީގެން ބޮޑު މަންފާއެއް ނަގަމުންދާ މައްސަލައަކީ އަ]ބަދުވެސް ބޮޑު މައްސަލަ އެކެވެ. ހިޔާ ފްލެޓުތައްވެސް ބޮޑު އަގުގައި ކުއްޔަށް ދެމުންއަންނަ އިރު ގެދޮރުވެރިޔާ މަޝްރޫއުގެ ދަށުން ދޫކުރާ 4،000 ފްލެޓު އެއްކޮށް ހަވާލުކޮށް ނުނިމެނީސް އެތަންތަން ކުއްޔަށް ދޭ މައްސަލަ މިހާރު ވަނީ ފެންމަތިވެފަ އެވެ.
މިކަމާއި ގުޅިގެން ހައުސިން މިނިސްޓަރު ޑރ. އަބްދުﷲ މުއްތަލިބު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ ސަރުކާރުގެ އިޖްތިމާއީ ބޯހިޔާވަހިކަމުގެ ތެރެއިން ދޫކޮށްފައިވާ ތަންތަނަކީ ރައްޔިތުންގެ ފައިސާއިން ބޮޑު ހޭދައެއްކޮށް، ސަބްސިޑައިޒްކޮށްފައިވާ އަގުތަކެއްގައި ދޫކޮށްފައިވާ ތަންތަން ކަމަށްވާއިރު އެތަންތަން ބޮޑެތި އަގުތަކުގައި ކުއްޔަށްދީ، އެތަންތަން ދެވުނު ފަރާތް ފިޔަވާ އެހެން ފަރާތްތަކުން ދިރިއުޅުމަށްވެސް އަދި އެހެން ބޭނުމަކަށްވެސް ބޭނުންކުރުމަކީ ސަރުކާރުން ގަބޫލުކުރާ ކަމެއްނޫން ކަމަށެވެ.
Advertisement
އެހެންކަމުން އެއްބަސްވުންތަކާ ހިލާފަށް ކުއްޔަށް ދީފައިވާ ތަންތަނާއި، އެތަންތަން ދެވިފައިވާ ފަރާތްނޫން އެހެން ފަރާތެއް ދިރިއުޅޭ ތަންތަނުގެ އެއްބަސްވުންތައް ބާތިލުކޮށް އެތަންތަން ދައުލަތަށް ނެގުމަށް ކުރަންޖެހޭ މަސައްކަތްކުރުމަށް ސަރުކާރުން ނިންމާފައިވާ ކަމަށް މިނިސްޓަރު ވިދާޅުވި އެވެ. އޭގެ އިތުރުން ސޯޝަލް ހައުސިން ގޮތުގައި ދޫކުރެވިފައިވާ ތަންތަން ބަލާ ފާސްކުރުމުގެ މަސައްކަތް، ކަމާގުޅުންހުރި އިދާރާތަކާ ގުޅިގެން ވީހާވެސް އަވަހަކަށް ފެށުމުގެ މަސައްކަތްވެސް ކުރަމުން އަންނަ ކަަމަށް މިނިސްޓަރު ވިދާޅުވި އެވެ.
ގެދޮރުވެރިޔާ ފްލެޓުތަކުން އަދި އެންމެ 78 ފްލެޓުގެ ތަޅުދަނޑި ހަވާލުކުރެވިފައިވާއިރު އެތަންތަން ކުއްޔަށް ދިނުމަށް އިޝްތިހާރު ކުރަން ވަނީ ފަށައިފަ އެވެ. ސަރުކާރަށް އެންމެ 11،500ރ ދައްކަންޖެހޭ 3 ކޮޓަރީގެ ފްލެޓެެއްވެސް ކުއްޔަށް ދޭން ޖަހާފައިވަނީ 25،000ރ އަށެވެ. ސަރުކާރަށް އެންމެ 7،000ރ ދައްކަންޖެހޭ 2 ކޮޓަރީގެ ހިޔާ ފްލެޓުތައްވެސް ކުއްޔަށް ދެމުންދަނީ 18،000ރ އަށްވުރެ ބޮޑު އަގުގަ އެވެ. ހިޔާ ފްލެޓުތައް ބިދޭސީންނަށް ކުއްޔަށްދޭ މައްސަލަވެސް ވަނީ ބޮޑުވެފަ އެވެ.
ވެ.
