ރަސްމާލެ ވޯޓަރފްރަންޓް މަޝްރޫއުގެ ދަށުން ތަރައްގީކުރާ އެއްވެސް ޕްރޮޕަޓީއެއް ސަރުކާރުގެ ހުއްދައާ ނުލައި އެހެން ފަރާތަކަށް ނުވިއްކޭނެ ކަމަށާއި، އެތަނުން މިލްކިއްޔާތެއް ގަތުމަކުން ރާއްޖެއަށް އެތެރެވުމުގެ ނުވަތަ ދިރިއުޅުމުގެ ވިސާއެއް އޮޓޮމެޓިކުން ނުލިބޭނެ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްތަލިބު ވިދާޅުވެއްޖެއެވެ.
ރަސްމާލެ މަޝްރޫއާ ގުޅޭގޮތުން އުފެދިފައިވާ ކަންބޮޑުވުންތަކަށް ރައްދު ދެއްވަމުން މިނިސްޓަރު މުއްތަލިބު ވިދާޅުވީ، މިއީ ބޭރުގެ ކުންފުންޏަކަށް ރާއްޖޭގެ ބިން "ހިލޭ" ދޫކޮށްލުމެއް ނޫން ކަމަށާއި، ބިމުގެ އެއްވެސް "ފްރީހޯލްޑް" މިލްކުވެރިކަމެއް އެއްވެސް ފަރާތަކަށް ނުލިބޭނެ ކަމަށެވެ. އަދި ޕްރޮޕަޓީ ގަންނަ ފަރާތްތަކާއި އެތަންތަން ލިބޭ ފަރާތްތައް ސަރުކާރުން ޗެކްކޮށް، ހުއްދަ ދިނުމާއި ނުދިނުމުގެ ފުރިހަމަ ބާރު އޮންނާނީ ދައުލަތަށް ކަމަށް އެމަނިކުފާނު ފާހަގަކުރެއްވިއެވެ.
މިނިސްޓަރު ވިދާޅުވީ ވިސާ ދިނުމަކީ ޑިވެލޮޕަރުގެ އެއްވެސް ބަހެއް އޮންނާނެ ކަމެއް ނޫން ކަމަށާއި، ވިސާ ދިނުމާއި ބާތިލުކުރުމުގެ ފުރިހަމަ އިހުތިޔާރު އޮންނާނީ ސަރުކާރަށް ކަމަށެވެ. މީގެއިތުރުން، މި އެއްބަސްވުމުގެ ދަށުން ހުޅުމާލޭގައި އަޅާ 5،000 ހައުސިންގ ޔުނިޓަކީ ސަރުކާރުގެ އެއްވެސް ލޯނެއް ނުވަތަ ސޮވަރިން ގެރެންޓީއެއް ނެތި ޑިވެލޮޕަރު އަޅައިދޭ ތަންތަން ކަމަށާއި، އެ ތަންތަނުގެ ކުލި ނަގާނީ ސީދާ ދައުލަތުން ކަމަށްވެސް މިނިސްޓަރު ވިދާޅުވިއެވެ.
Advertisement
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ވަނީ މި މަޝްރޫއުގައި ގާނޫނުއަސާސީއާ ހިލާފު އެއްވެސް ކަމެއް ނޯންނާނެ ކަމަށާއި، ބޭރުގެ އެއްވެސް ފަރާތަކަށް ބިން މިލްކުކޮށް ނުދެވޭނެ ކަމުގެ ފުރިހަމަ ޔަގީންކަން ދެއްވާފައެވެ.
