'ބިންވެރިޔާ' އަދި 'ގެދޮރުވެރިޔާ' ސްކީމްގެ ދަށުން ގޯއްޗާއި ފުލެޓް ދޭނެކަމަށް ބުނެ ހިންގަމުންދާ އޮޅުވާލުންތަކަށް ސަމާލުވުމަށް ހައުސިން މިނިސްޓްރީން އިލްތިމާސްކުރައްވައިފިއެވެ.
އެ މިނިސްޓްރީ އިން ނެރުނު ނޫސްބަޔާނުގައި ބުނީ، ގޯއްޗާއި ފުލެޓް ދޫކުރުމުގެ ހުރިހާ މަރުހަލާއެއްވެސް ކުރިއަށްދާނީ ސަރުކާރުގެ ގެޒެޓުގައި ޝާއިއުކޮށްފައިވާ ރަސްމީ އުސޫލުތަކާ އެއްގޮތަށް ކަމަށެވެ.
އަދި ސަރުކާރުގެ ބޯހިޔާވަހިކަމުގެ މަޝްރޫއުތަކުގެ ދަށުން ގޯތި ނުވަތަ ފުލެޓް ހޯދައިދޭނެކަމަށް ބުނެ އެއްވެސް ފަރާތަކުން ހިންގާ ފައިސާގެ މުއާމަލާތެއްގައި ބައިވެރިނުވުމަށް އެ މިނިސްޓްރީން ވަނީ އަންގާފައެވެ.
މީގެ އިތުރުން، ކަނޑައެޅިފައިވާ ރަސްމީ އުސޫލުތަކުން ބޭރުން އެއްވެސް މުއާމަލާތެއް ނުހިންގުމަށާއި، މިފަދަ ކަމެއް އެއްވެސް ފަރާތަކުން ހުށަހަޅައިފިނަމަ ނުވަތަ އެފަދަ ކަމެއްގެ މައުލޫމާތު ލިބިއްޖެނަމަ ލަސްނުކޮށް އެކަން ރިޕޯޓުކުރުމަށްވެސް ވަނީ އެދިފައެވެ.
އެގޮތުން މިފަދަ ސްކޭމްތަކާ ގުޅޭ މައްސަލަތައް ރިޕޯޓުކުރުމަށް މޯލްޑިވްސް ޕޮލިސް ސާވިސްގެ އެންޓި ސްކޭމް ސެންޓަރުގެ ހޮޓްލައިން ނަންބަރު 125 އަށް ގުޅުއްވުމަށް ވެސް އެ މިނިސްޓްރީން ވަނީ އެދިފައެވެ.
