ނިމިދިޔަ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއުގެ ދަށުން ގޯއްޗަށް އެދި ހުށަހެޅިއިރު، ސައްހަ ނޫން މައުލޫމާތާއި ލިޔެކިޔުންތައް ހުށަހެޅި ކަމަށް ތުހުމަތުކުރެވޭ 12 މީހެއްގެ މައްޗަށް ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.
މިކަމާ ގުޅޭގޮތުން ކަމާބެހޭ އިދާރާތަކުން މައުލޫމާތު ދީފައިވާ ގޮތުގައި، މިދިޔަ ސަރުކާރުން "ބިންވެރިޔާ ސްކީމް" މި ސްކީމުގެ ދަށުން ގޯއްޗާއި ފުލެޓަށް ހުށަހެޅުމަށް ހުޅުވާލި ފުރުސަތުގައި ބައެއް ފަރާތްތަކުން ވަނީ ނުހައްގުން ޕޮއިންޓް އިތުރުކުރުމަށް މަސައްކަތް ކޮށްފައެވެ. މިގޮތުން، އަމިއްލަ ދިރިއުޅުމުގެ ހާލަތާއި، އާއިލީ މައުލޫމާތުތަކުގެ އިތުރުން ވަޒީފާއާ ގުޅޭ ސައްހަ ނޫން ލިޔެކިޔުންތައް ތައްޔާރުކޮށް ހުށަހަޅާފައިވާކަން ތަހުގީގަށް ވަނީ ފާހަގަކުރެވިފައެވެ.
މި މައްސަލައިގައި ދައުވާކުރުމަށް ފޮނުވާފައިވަނީ ފޯމު ހުށަހެޅިއިރު ގަސްތުގައި އޮޅުވާލަން މަސައްކަތްކޮށްފައިވާކަން ކަށަވަރުކުރެވުނު ފަރާތްތަކުގެ މައްޗަށެވެ. މީގެ ތެރޭގައި ހިމެނެނީ މާލޭގެ ދަފްތަރުގައި ހިމެނޭ މީހުންނާއި، މާލޭގައި ދިގު މުއްދަތަކަށް ދިރިއުޅޭ ކަމަށް ބުނެ ދޮގު މައުލޫމާތު ދިން މީހުންނެވެ.
Advertisement
އެ ފަރާތްތަކަކީ؛
- ގ. ޕޫލްބަހާރުއާގެ، އަހްމަދު އަތީގް އަބްދުالله
- ނ. ވެލިދޫ، ޑޭޒީމާގެ އަހްމަދު މާޒިން
- ސ. ހިތަދޫ، ހަޒާރުމާގެ، މަރްޔަމް ސާއީ
- މ. ޒޭވަރު، މުހައްމަދު ފަޒީލް ރަޝީދު
- ޏ. ފުވައްމުލައް، ދޫޑިގަން، ދިލް، އީމާ ވަހީދު
- ދަފްތަރު. ނަންބަރު ރސ 9044، އާއިޝަތު މައުރޫފާ
- ހުޅުމާލެ. ފްލެޓް ނަންބަރު 02-ޖީ- 46، މުހައްމަދު އާދަމް
- ހއ. ދިއްދޫ، ޖަމީލާ، އަބްދުލްމަޖީދު މާހިރު
- މ. ވެސްޓްކޯސްޓް، ހުސައިން ޒާހިރު ޒައިނު
- މ. ފަޅުމަތީގެ، އަޝްހަދު އަލީ
- މ. ފަޅުމަތީގެ، އަހްމަދު އަލީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބޯހިޔާވަހިކަމުގެ މަޝްރޫއުތައް ކުރިއަށްގެންދާއިރު، އެންމެ ބޮޑު އިސްކަމެއް ދެނީ ހައްގުވެރިންނަށް ބޯހިޔާވަހިކަން ކަށަވަރުކޮށްދިނުމަށެވެ.
ކަމާބެހޭ މިނިސްޓްރީން ވަނީ ބޯހިޔާވަހިކަމަށް އެދި ހުށަހަޅާއިރު އެއްވެސް ފަރާތަކުން އޮޅުވާލައިގެން ލިޔެކިޔުންތައް ހުށަނޭޅުމަށް އިލްތިމާސްކޮށްފަ އެވެ. އަދި ހުށަހަޅާ ހުރިހާ ލިޔެކިޔުންތަކެއްގެ ސައްހަކަން ކަށަވަރުކުރުމަށް ހަރުދަނާ ނިޒާމެއް ގާއިމުކުރެވިފައިވާ ކަމަށްވެސް އެ މިނިސްޓްރީން ބުނެފައިވެ އެވެ.
