މި ސަރުކާރު ހަވާލުވިތާ ތިން އަހަރު ދުވަހުގެ ތެރޭގައި 1.3 ޓަނަށް ވުރެ ގިނަ މަސްތުވާތަކެތި އަތުލައިގަނެ، މަސްތުވާތަކެތީގެ 23 މައްސަލައެއް މަނީ ލޯންޑަރިންގެ މައްސަލައިގެ ގޮތުގައި ތަހުގީގުކޮށްފައިވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ. މިނިސްޓަރު މިހެން ވިދާޅުވީ އަންނަ ހުކުރު ދުވަހުގެ ނިޔަލަށް ކުރިއަށްދާ ޕީއެންސީގެ މަތީ މަޖިލީހުގެ ތެރެއިން ބޭއްވި ދަންފަޅިއެއްގައި މައުލޫމާތު ދެއްވަމުންނެވެ.

އިހުސާން ފާހަގަކުރެއްވި ގޮތުގައި، މީގެ ކުރިން މަސްތުވާތަކެތީގެ ވިޔަފާރިކުރާ މީހުންނާ މެދު ހަރުކަށި ފިޔަވަޅު އަޅަން ގާނޫނުން އެކަށީގެންވާ ފުރުސަތެއް ނެތެވެ. ނަމަވެސް މަސްތުވާތަކެތީގެ ޒަމާންވީ މައްސަލައަށް ދާއިމީ ހައްލެއް ހޯދުމަށްޓަކައި، ރާއްޖެއަށް މަސްތުވާތަކެތި އެތެރެކޮށް ސަޕްލައިކުރުން ހުއްޓުވުމާއި، މަސްތުވާތަކެއްޗަށް ދެވިހިފާފައިވާ މީހުން އެކަމުން ދުރުކުރުމަށް ސަރުކާރުން ވަނީ ހާއްސަ ފިޔަވަޅުތަކެއް އަޅަން ފަށާފައެވެ.

މީގެ އިތުރުން، ރާއްޖެއަށް ވަކި މިންވަރަކަށް ވުރެ ގިނައިން މަސްތުވާތަކެތި އެތެރެކޮށް ވިޔަފާރިކުރާ ފަރާތްތަކަށް މަރުގެ އަދަބު ދިނުމަށް ރައީސުލްޖުމްހޫރިއްޔާ ނިންމެވި ނިންމެވުމަށް، ރައްޔިތުންގެ މަޖިލީހުގެ އެހީތެރިކަމާއެކު މިހާރު ގާނޫނީ ސިފަ އައިސްފައިވާކަން މިނިސްޓަރު ފާހަގަކުރެއްވިއެވެ.

އިހުސާންގެ ވާހަކަފުޅުގައި އިތުރަށް ވިދާޅުވީ، އިންތިހާބުތަކާ ދިމާކޮށް މަސްތުވާތަކެތީގެ ވިޔަފާރިކުރާ ފަރާތްތަކުން ސިޔާސީ ފަރާތްތަކާ ގުޅުން ބަދަހިކޮށް ޖަލުން މިނިވަންވާ އާދަ މީގެ ކުރިން އޮތް ކަމަށެވެ. އަދި ވެރިކަން ބަދަލުވާ ކޮންމެ ފަހަރަކު އެފަދަ މީހުން ހައްޔަރުކުރުމަށްފަހު، އަނެއްކާވެސް އިންތިހާބުތަކާ ދިމާކޮށް ދޫކޮށްލާ އުސޫލު ކުރިން އޮތްކަން އޭނާ ވަނީ ފާހަގަކުރައްވާފައެވެ.