ގިރާވަރުފަޅުގެ ލޭންޑް ޔޫސް ޕްލޭނަށް އަނެއްކާވެސް ބަދަލުތަކެއް ގެނައުމަށްފަހު، ފިނޭންސް އެންޑް ޕްލޭނިން މިނިސްޓްރީން މިއަދު އާއްމުކޮށްފި އެވެ.
އެ މިނިސްޓްރީން ހާމަކުރި ގޮތުގައި، މިއަދު ނެރުނު ޕްލޭނަކީ 15 އޮކްޓޫބަރު 2024 ގައި ޝާއިއުކުރި ޕްލޭނަށް އިސްލާހުތަކެއް ގެނެސްގެން ތައްޔާރުކޮށްފައިވާ އާ ޕްލޭނެކެވެ.
މިއަދު އާއްމުކުރި އާ ލޭންޑްޔޫސް ޕްލޭނުގައި އެކި ބޭނުންތަކަށް ކަނޑައަޅާފައިވާ ސަރަހައްދުތައް ވަކިކޮށް އެނގޭނެހެން ތަފާތު ކުލަތަކުން ވަނީ ފާހަގަކޮށްފަ އެވެ. މީގެ ތެރޭގައި ވިޔަފާރި ބޭނުންތަކާއި، އިޖުތިމާއީ ސަރަހައްދުތަކާއި، ތައުލީމީ މަރުކަޒުތަކުގެ އިތުރުން ސިއްހީ ހިދުމަތްދޭ ހޮސްޕިޓަލްތަކަށް ހާއްސަ ބިންތައް ހިމަނާފައިވެ އެވެ.
Advertisement
ކުރީގެ ސަރުކާރުން ގޯތި ދޫކުރިއިރު އަސާސީ ހިދުމަތްތަކަށް ބޭނުންވާނެ ޖާގަ އެކަށީގެންވާ ގޮތެއްގައި ކަނޑައަޅާފައި ނެތުމުން، މި ސަރުކާރުން ވަނީ އާ ޕްލޭނެއް އެކުލަވާލާނެކަން ކުރިންވެސް އިއުލާނުކޮށްފަ އެވެ. 2024 ވަނަ އަހަރު ގިރާވަރުފަޅުގެ ޕްލޭނަށް ބަދަލު ގެނައީ މި މައްސަލަތައް ހައްލުކުރުމަށެވެ.
ގިރާވަރުފަޅުގެ އާ ލޭންޑް ޔޫސް ޕްލޭން---
ގިރާވަރުފަޅުގެ ޕްލޭނަށް މި ބަދަލުތައް ގެނައިރު، އެ ސަރަހައްދުގެ ބިން ހިއްކުމުގެ މަސައްކަތް ސަރުކާރުން ދަނީ ކުރަމުންނެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ ނޮވެމްބަރު މަހު ވިދާޅުވެފައިވާ ގޮތުގައި، ކުރިއަށް އޮތް ތިން މަސްދުވަހުގެ ތެރޭގައި ގިރާވަރުފަޅާއި ހުޅުމާލެ ތިންވަނަ ފިޔަވަހި ހިއްކުމުގެ މަސައްކަތް އެއްކޮށް ނިންމާލެވޭނެ އެވެ. ހުޅުމާލެ ހިއްކުމުގެ މަސައްކަތް މިހާރު އެއްކޮށް ނިމިފައިވާއިރު ގިރާވަރުފަޅު ހިއްކުމަށް އަންނަނީ ތައްޔާރު ވަމުންނެވެ.
ކުރީގެ ސަރުކާރުން ގިރާވަރުފަޅުގެ 170 ހެކްޓަރުން 5,186 ގޯތި ދޫކުރަން ނިންމާފައި އޮތް ނަމަވެސް، އެއީ އެތަނުގައި އާބާދުވާނެ މީހުންގެ ނިސްބަތުން ދިރިއުޅެން އެންމެ އެކަށޭނަ މާހައުލަކަށް ނުވާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ވަނީ ކުރިން ފާހަގަކުރައްވާފަ އެވެ. އެހެންކަމުން، އެ ސަރަހައްދުގެ ތޮއްޖެހުން ކުޑަކުރުމުގެ ގޮތުން 1,114 ގޯތި ގުޅީފަޅަށް ބަދަލުކުރުމަށް ނިންމައި، އެކަމަށް އެދުނު ފަރާތްތަކުގެ މެދުގައި މިހާރު ވަނީ ގުރުއަތުލުންވެސް ކުރިއަށް ގެންގޮސްފަ އެވެ.
