ނިމިދިޔަ އެމްޑީޕީ ސަރުކާރުގެ ދައުރުގައި، ސަރުކާރު ހިއްސާވާ ކުންފުނިތަކުގެ (އެސްއޯއީ) މުވައްޒަފުންގެ އަދަދު ގާތްގަނޑަކަށް 97 އިންސައްތަ އިތުރުވެފައިވާ ކަމަށް މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރު މިއަދު ރައްޔިތުންގެ މަޖިލީހުގައި ވިދާޅުވެއްޖެއެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ޒަރީރު ވިދާޅުވީ، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ (ޕީސީބީ) ތަފާސްހިސާބުތަކުން ދައްކާ ގޮތުގައި 2019 އިން 2023 އަށް ސަރުކާރު ކުންފުނިތަކަށް 18،053 މުވައްޒަފުން އިތުރުވެފައިވާ ކަމަށެވެ. މިނިސްޓަރު މި ތަފާސްހިސާބުތައް ހާމަކުރެއްވީ، ސަރުކާރު ކުންފުނިތަކަށް މުވައްޒަފުން އައްޔަނުކުރާ އުސޫލުތަކާއި ކުންފުނިތަކުގެ އޮނިގަނޑު ހަރުދަނާކުރުމަށް (ރައިޓް-ސައިޒިންގ) ގެންގުޅޭ ސިޔާސަތާ ގުޅޭގޮތުން މެންބަރު ކުރެއްވި ސުވާލާ ގުޅިގެންނެވެ.
ހަމައެއާއެކު، ވަކި މުވައްޒަފެއްގެ ސިޔާސީ ފިކުރަށް ބަލައި ވަޒީފާއިން ވަކިކުރުމަކީ މި ސަރުކާރުން ތާއީދުކުރާ ކަމެއް ނޫން ކަމަށާއި، އަދި އެފަދަ އުސޫލަކުން އެއްވެސް މުވައްޒަފަކު ވަކިކުރުމަށް އެ ވުޒާރާއިން އެއްވެސް ކުންފުންޏަކަށް އަންގާފައި ނުވާނެ ކަމަށް ވަޒީރު ވިދާޅުވިއެވެ. ނަމަވެސް، ކުންފުނިތަކަކީ މާލީ ގޮތުންނާއި ހިންގުމުގެ ނިޒާމުގެ ތެރެއިން ދެމެހެއްޓެނިވި ގޮތެއްގައި ކުރިއަށްދާ ތަންތަންކަން ކަށަވަރުކުރުމުގެ މަސްއޫލިއްޔަތު އެ ވުޒާރާއަށް އޮންނަކަން ފާހަގަކުރެއްވިއެވެ.
Advertisement
އެގޮތުން ދައުލަތުގެ މާލީ ހާލަތަށް ރިއާޔަތްކޮށް، ކުންފުނިތަކުގެ ހިންގުން ހަރުދަނާކުރުމަށް ޕީސީބީ މެދުވެރިކޮށް ތަކުރާރުކޮށް އިރުޝާދު ދެވިފައިވާނެ ކަމަށްވެސް ވިދާޅުވިއެވެ. މި އިރުޝާދުތަކަކީ ވަކިވަކި މުވައްޒަފުންނަށް އަމާޒުކޮށް ދެވޭ އެއްޗެއް ނޫން ކަމަށާއި، މިއީ ކުންފުނިތަކުގެ ހިންގުން ހަރުދަނާކޮށް މާލީ ގޮތުން އަމިއްލަ ފައިމައްޗަށް ތެދުވުމަށް މަގުފަހިކޮށްދިނުމުގެ ގޮތުން ދެވޭ އިރުޝާދުތަކެއް ކަމަށް ވަޒީރު ބަޔާންކުރެއްވިއެވެ.
ރައްޔިތުންގެ މަޖިލީހަށް ހުށަހެޅުއްވި ތަފާސްހިސާބުތަކަށް ބަލާއިރު، 2018 ވަނަ އަހަރު 18،676 ގައި ހުރި މުވައްޒަފުންގެ އަދަދު 2023 ވަނަ އަހަރުގެ ނިޔަލަށް ވަނީ 36،729 އަށް އިތުރުވެފައެވެ. އަދި މިހާރު މި އަދަދު 41،667 އަށް އަރާފައިވާއިރު، މިއީ 13 އިންސައްތައިގެ އިތުރުވުމެއްކަން ވަޒީރު ފާހަގަކުރެއްވިއެވެ. މީގެއިތުރުން، އެމްޑީޕީ ސަރުކާރުގައި އިތުރަށް ނެގި މުވައްޒަފުންނަށް މުސާރަ ދިނުމަށްޓަކައި، އެ ސަރުކާރު ނިމުނުއިރު އެޑްވާންސް ސަބްސިޑީގެ ގޮތުގައި 634 މިލިއަން ރުފިޔާ ދޫކޮށްފައިވާ ކަމަށްވެސް ވަޒީރު ހާމަކުރެއްވިއެވެ.
