މާލެ ސަރަހައްދުގެ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، ގޯއްޗާއި ފްލެޓަށް އެދި ހުށަހެޅުމަށް ހުޅުވާލި ފުރުސަތުގައި މިހާތަނަށް ގިނަ އަދަދެއްގެ ބަޔަކު ފޯމު ހުށަހަޅައިފި އެވެ. ތަފާސްހިސާބުތަކުން ދައްކާ ގޮތުގައި މިހާތަނަށް ގޯއްޗަށް އެދި 1,633 ފޯމު ހުށަހަޅާފައިވާއިރު، ފްލެޓަށް އެދި 3,434 ފޯމު ވަނީ ހުށަހަޅާފައެވެ.

މި މަޝްރޫޢުގެ ދަށުން ޖުމުލަ 15,000 ގޯތި ދޫކުރުމަށް ސަރުކާރުން ވަނީ ނިންމާފައެވެ. މިގޮތުން ދޫކުރާ ކޮންމެ ގޯއްޗަކީ 1,250 އަކަފޫޓުގެ ބިމެކެވެ. މާލޭގެ ރަށްވެހިންނަށާއި، ހާއްސަ އިސްކަންދޭ ކެޓަގަރީތަކަށް ގޯތި ދޫކުރުމަށް ހަމަޖެހިފައިވަނީ ގްރޭޓާ މާލޭ ސަރަހައްދުންނާއި އަލަށް ތަރައްގީކުރާ ރަސްމާލެއިންނެވެ. މީގެ އިތުރުން، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފައިވަނީ ރަސްމާލެއިންނެވެ.

ފްލެޓް ދޫކުރުމުގެ މަޝްރޫއަށް ބަލާއިރު، ޖުމުލަ 7,900 ފްލެޓް ދޫކުރުމަށް ވަނީ ކަނޑައަޅާފައެވެ. އެއީ:

1. މާލޭ ރަށްވެހިންނަށް: 4,000 ފްލެޓް
2. މާލޭގައި ދިރިއުޅޭ އެހެން ރަށްރަށުގެ މީހުންނަށް: 1,500 ފްލެޓް
3. ހާއްސަ އިސްކަންދޭ ކެޓަގަރީތަކަށް: 2,400 ފްލެޓް

ބޯހިޔާވަހިކަމުގެ މި މަޝްރޫއަށް ފޯމު ހުށަހެޅުމުގެ ސުންގަޑިތަކަށް ބަލާއިރު، ގޯއްޗަށް އެދި ފޯމު ހުށަހެޅުމުގެ އެންމެ ފަހު ތާރީހަކީ މާޗު މަހުގެ 4 ވަނަ ދުވަހެވެ. އަދި ފްލެޓަށް އެދި ހުށަހެޅުމުގެ ފުރުސަތު އެޕްރީލް މަހުގެ 17 ވަނަ ދުވަހުގެ ނިޔަލަށް ވަނީ ހުޅުވާލެވިފަ އެވެ.

މި ސަރުކާރުން އަމާޒު ހިފާފައިވަނީ، ދިވެހި ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ދާއިމީ އަދި ހަރުދަނާ ހައްލެއް ހޯދައިދިނުމަށެވެ.