އިސްރާއީލުން މިފަހަރު ދިން ޙަމަލާގައި އީރާނުގެ މުހިންމު އަސްކަރީ ތަންތަނަށް އަމާޒުކޮށްފައިވާ ކަމަށާއި ކުރީގެ ނިއުކްލިއާ ހަތިޔާރުގެ ޕްރޮގްރާމާ ގުޅިފައިވާ ޢިމާރާތެއްގެ އިތުރުން މިސައިލް އުފައްދާ ތަންތަނަށް ވެސް ހަމަލާދިން ކަމަށް ރޮއިޓާސްއިން ރިޕޯޓް ކޮށްފިއެވެ.
އެމެރިކާގެ ތަޙުލީލުކުރާ ޑޭވިޑް އޮލްބްރައިޓް އާއި ޑެކަރ އެވެލެތު ބުނާ ގޮތުގައި ސެޓެލައިޓް ފޮޓޯތަކުން އެނގޭ ގޮތުގައި އިސްރާއީލުން ވަނީ ތެހެރާން ކައިރީގައި އޮންނަ ޕާޗިން އާއި ޚޯޖިރުގައި ހުރި ފެސިލިޓީތަކަށް ހަމަލާދީފަ އެވެ. މި ތަންތަނުގެ ތެރޭގައި ބެލިސްޓިކް މިސައިލްތަކަށް ބޭނުންވާ ސޮލިޑް ފިއުލް އެއްކޮށްފައިވާ އިމާރާތްތައް ހިމެނެ އެވެ. ސޮލިޑް ފިއުލް އުފެއްދުމަށް ބޭނުންކުރާ މިކްސަރުތައް ބަދަލުކުރަން އުނދަގޫވާތީ، މި ހަމަލާތަކުގެ ސަބަބުން އީރާނުގެ މިސައިލް އުފެއްދުމުގެ ގާބިލްކަމަށް ވަރަށް ބޮޑަށް އަސަރުކުރާނެ ކަމަށް އެމީހުންނާއި ޙަވާލާދީ ރޮއިޓާސްއިން ބުނެއެވެ.
އިސްރާއީލުގެ އަސްކަރީ އޮފިޝަލުން ކަށަވަރުކޮށްދިން ގޮތުގައި އެ ވައިގެ ހަމަލާތަކަކީ އޮކްޓޯބަރު މަހުގެ އެއްވަނަ ދުވަހު އީރާނުން ފޮނުވާލި 200 އަށް ވުރެ ގިނަ މިސައިލްގެ ތޫފާނަށް ރައްދު ދިނުމެވެ.
Advertisement
މި ޙަމަލާތަކުގެ ސަބަބުން މިސައިލް އުފެއްދުމަށް ބުރޫއަރާފައިވާތީ، ކުރިއަށް އޮތްތަނުގައި އިސްރާއީލަށް މިސައިލް ޙަމަލާތައް ދިނުމަށް ހުރަސްއެޅިދާނެ ކަމަށް ތަހުލީލު ކުރާ ފަރާތްތަކުން ލަފާކުރެ އެވެ.
އޮލްބްރައިޓްގެ ތަޙުލީލުތައް ބިނާކޮށްފައިވަނީ ވިޔަފާރި ސެޓެލައިޓް ފޮޓޯތަކުން ލިބުނު މަޢުލޫމާތާއި އީރާނުގެ ނިއުކްލިއާ ޕްރޮގްރާމްގެ ތަފްޞީލު ލިޔެފައިވާ 2018 ވަނަ އަހަރު އިސްރާއީލުގެ މޮސާޑުން ވަގަށް ނެގި ފައިލްތަކުން ލިބުނު މަޢުލޫމާތުތަކުގެ މައްޗަށް ހަދާފައިވާ ތަޙުލީލެކެވެ.
