އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން އަހަރެއްގެ މައްޗަށް 1.9 މިލިއަން ޑައިގްނޯސްޓިކް ލެބޯޓްރީ ޓެސްޓު ހަދާކަމަށް އެ ހޮސްޕިޓަލުގެ ތަފާސް ހިސާބުތަކުން ދައްކައިފިއެވެ. މި މަޢުލޫމާތު ހާމަކުރެއްވީ މާލޭ ގްރޫޕް އޮފް ހޮސްޕިޓަލްސްއިން ބޭއްވި ނޫސްވެރިންގެ ބައްދަލުވުމުގައި އެ ގްރޫޕުގެ ސީއީއޯ އިބްރާހިމް ޢަބްދުއްރައްޒާޤް ޙަލީމެވެ.
ޙަލީމް ދެއްވި މަޢުލޫމާތުގައި، އައިޖީއެމްއެޗްގެ އިތުރުން ހުޅުމާލެ ހޮސްޕިޓަލުގައި އަހަރަކު 483,185 ލެބް ޓެސްޓު ހަދާކަމަށް ވިދާޅުވިއެވެ. މީގެއިތުރުން، އައިޖީއެމްއެޗްގެ އިމަޖެންސީ އަދި ޖީޕީ ޑިޕާޓްމަންޓުން އަހަރަކު 150,000 މީހުންނަށް ފަރުވާދޭއިރު، ހުޅުމާލެ ހޮސްޕިޓަލުގައި މި އަދަދަކީ 238,978 އެވެ. ވިލިމާލޭ ހޮސްޕިޓަލުގެ އިމަޖެންސީ އަދި ޖީޕީ ޑިޕާޓްމަންޓުން ފަރުވާ ހޯދާފައިވަނީ 2,307 މީހުންނެވެ.
- ސާޖަރީގެ ދާއިރާއަށް ބަލާއިރު، އައިޖީއެމްއެޗްގައި އަހަރަކު 25,500 މީހުންގެ ސާޖަރީ ހަދާއިރު، ހުޅުމާލެ ހޮސްޕިޓަލުގައި މި ޢަދަދަކީ 1,696 އެވެ. އެކްސްރޭ އަދި ސްކޭންތަކުގެ ތަފާސް ހިސާބުތަކަށް ބަލާއިރު، އައިޖީއެމްއެޗްގައި 285,120 އެކްސްރޭ އަދި ސްކޭން ހަދާއިރު، ހުޅުމާލެ ހޮސްޕިޓަލުގައި 121,531 އަދި ވިލިމާލޭގައި 5,697 ހަދާފައިވެއެވެ.
- މި ތަފާސް ހިސާބުތަކުން ދައްކާގޮތުގައި، އައިޖީއެމްއެޗްއަކީ ރާއްޖޭގެ އެންމެ ބޮޑު އަދި އެންމެ ގިނަ ޚިދުމަތްތައް ފޯރުކޮށްދޭ ހޮސްޕިޓަލެވެ.
