މޫސުމީ ބަދަލުތަކާ ކުރިމަތިލެވޭ ގޮތަށް، ނޫ އިޤްތިޞާދު ބައްޓަންކޮށް، އީޖާދީގޮތެއް ހޯދުމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމް ގޮވާލައްވާފިއެވެ.

ޗައިނާގެ ޝިންޑާއޯގައި ކުރިއަށްދާ ގްލޯބަލް އޯޝަން ޑިވެލޮޕްމަންޓް ފޯރަމްގައި ތަޤްރީރުކުރައްވަމުން ނާޒިމް ވަނީ ކަނޑުގެ ވެށި ކިލަނބުވިޔަ ނުދިނުމަށް ދުނިޔޭގެ ފެންވަރުގައި ފިޔަވަޅުތައް އަޅައިދިނުމަށް ގޮވާލައްވައި، އެ ރޮނގުން ރާއްޖެއިން އަަޅާފައިވާ ފިޔަވަޅުތައް ޙިއްސާކުރެއްވާފައިވެއެވެ. އެގޮތުން އޭނާ ވިދާޅުވީ، ރާއްޖެއިން ކަނޑުގެ 93 ސަރަޙައްދެއް ހިމާޔަތްކޮށްފައިވާ ކަމަށާއި، އެއީ ގާތްގަނޑަކަށް 63 ހާސް ހެކްޓަރުގެ ސަރަޙައްދެއް ކަމަށެވެ.

ނާޒިމް އިތުރަށް ވިދާޅުވީ މޫސުމީ ބަދަލުތަކާ ކުރިމަތިލުމުގައި ނޫ އިގްތިސާދުން މުހިންމު ދައުރެއް އަދާކުރަން ޖެހޭ ކަމަށެވެ. އަދި ބުލޫ ކާބަން ޕްރޮޖެކްޓްތަކަށް ފައިނޭންސްކުރުމުގެ މުޙިންމުކަމަށް ނާޒިމް އަލިއަޅުއްވާލެއްވިއެވެ. މީގެ އިތުރުން، މޫދުވިނައިން ކާބަން އެބްޒޯބްކުރާ މިންވަރަކީ، ރެއިން ފޮރެސްޓްތަކަށް ވުރެ ހެކްޓަރަކަށް %40 އިތުރު ޢަދަދެއްކަން ފާހަގަކުރެއްވިއެވެ.

ރާއްޖޭގެ މަސްވެރިކަމުގެ ސަޤާފަތާއި ދޮށީގެ މަސްވެރިކަމުގެ މައްޗަށް އަލިއަޅުއްވާލައްވަމުން، ނާޒިމް ވިދާޅުވީ ދުނިޔޭގެ ފެންވަރުގައި ކާބޯތަކެތީގެ ރައްކާތެރިކަން ކަށަވަރުކުރުމަށާއި، ޤަވާޢިދާ ޚިލާފަށް ކުރާ މަސްވެރިކަން ހުއްޓުވުމަށާއި ކަނޑުގެ ދިރުން ޙިމާޔަތްކުރުމަށްޓަކައި ރާއްޖޭގެ ތަޖުރިބާއިން ޢިބްރަތް ލިބިގަތުމަށް އެދިވަޑައިގަންނަވާ ކަމަށެވެ.

މީގެ އިތުރުން، ކަނޑުން ހަކަތަ އުފެއްދުމާއި މެރިން ބަޔޯޓެކްނޮލޮޖީގެ ހޯދުންތައް އިތުރުކޮށް ފުޅާކުރުމަށް ޤައުމުތަކުން ގުޅިގެން މަސައްކަތްކުރުމުގެ މުޙިންމުކަމަށް ވެސް ނާޒިމް އަލިއަޅުއްވާލެއްވިއެވެ.

ގްލޯބަލް އޯޝަން ޑިވެލޮޕްމަންޓް ފޯރަމްއަކީ ނޫ އިޤްތިޞާދުގެ ރޮނގުން ޤައުމުތައް ގުޅިގެން މަސައްކަތްކުރުމުގެ މަޤްޞަދުގައި ބާއްވާ ފޯރަމެކެވެ. މި ފޯރަމް މި މަހުގެ 25ގެ ނިޔަލަށް ކުރިއަށްދާއިރު، މި ފޯރަމްގައި ސިޔާސަތު ކަނޑައަޅާ 400 ފަރާތެއް ބައިވެރިވެވަޑައިގަންނަވައެވެ.