ދައުލަތުން ސިޔާސީ މުވައްޒަފުންނަށް ޚަރަދު ކުރަނީ މުޅި ދައުލަތުގެ ޚަރަދުގެ އެންމެ 1 އިންސައްތަ ކަމަށް މާލީ ވަޒީރު މޫސާ ޒަމީރު މިއަދު ހާމަކުރައްވައިފިއެވެ.
ވަޒީރު މިހެން ވިދާޅުވީ މިއަހަރަށް ލަފާކުރާ ސަޕްލިމަންޓްރީ ބަޖެޓު ރައްޔިތުންގެ މަޖިލީހަށް ހުށަހަޅުއްވައިދެއްވަމުންނެވެ.
ވަޒީރުގެ ވާހަކަފުޅުގައި، މިއަހަރަށް ފާސްކޮށްފައިވާ ބަޖެޓުގައި ހިމެނޭ ގިނަ އިސްލާހުތައް ތަންފީޒުކުރުމަށް ބޭނުންވާ ޓެކްނިކަލް މަސައްކަތްތައް ފެށުމުގެ ސަބަބުން، އެ ކަންކަން ތަންފީޒުކުރުން ލަސްވެފައިވާ ކަމަށް ފާހަގަކުރެއްވިއެވެ. އަދި މި އިސްލާހުތަކަކީ ކުރީގެ ސަރުކާރުން އަހަރުތަކެއް ވަންދެން ދައްކަމުން އައި ވާހަކަތަކެއް ނަމަވެސް، އޭގެ މަސައްކަތްތައް ކުރިއަށް ގެންގޮސްފައި ނުވާކަންވެސް ފާހަގަކުރެއްވިއެވެ.
Advertisement
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއެކު ޚަރަދު ކުޑަކުރުމަށް ގިނަ ފިޔަވަޅުތަކެއް މިހާރުވެސް އަޅަމުންދާކަން ވަޒީރު ފާހަގަކުރެއްވިއެވެ. މީގެ ތެރޭގައި ދަތުރުފަތުރާއި ހަފްލާތަކަށް ކުރާ ޚަރަދުތައް ހިފެހެއްޓުމަށް އަޅަމުންދާ ފިޔަވަޅުތަކުގެ ނަތީޖާ ފެންނަމުންދާކަމަށްވެސް ވިދާޅުވިއެވެ.
މީގެއިތުރުން، ސިޔާސީ މަޤާމުތަކުގައި ތިއްބެވި ފަރާތްތަކާއި، ބައެއް މުއައްސަސާތަކުގެ ވެރިންނާއި، ސަރުކާރު ހިއްސާވާ ކުންފުނިތަކުގެ ބައެއް މުވައްޒަފުންގެ މުސާރަތައް 2 އަހަރު ދުވަހުގެ މުއްދަތަށް ދަށްކުރަން ނިންމާފައިވަނީވެސް ޚަރަދުތައް ކުޑަކުރުމުގެ ގޮތުން ކަމަށް ވަޒީރު ވިދާޅުވިއެވެ.
"ސިޔާސީ ފަރާތްތަކުގެ މުސާރައަށް ކުރާ ހޭދައަކީ ސަރުކާރުގެ މުޅި މުސާރައާއި އިނާޔަތްތަކަށް ހޭދަކުރާ މިންގަނޑުގެ 4 އިންސައްތައަށްވުރެ ދަށް އަދަދެއް. އަދި މުޅި ދައުލަތުގެ ޚަރަދުގެ 1 އިންސައްތަ." މާލީ ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ ސަޕްލިމެންޓަރީ ބަޖެޓުގައި ހިމަނާފައިވާ ހަރަކާތްތަކުން ރައްޔިތުންނަށް ދޭ ޚިދުމަތްތަކުގެ މިންވަރާއި ފެންވަރު ރަނގަޅުވެގެންދާނެ ކަމަށް އުއްމީދުކުރައްވާ ކަމަށެވެ. އަދި މިއީ ރައްޔިތުންގެ އާންމު ހާލަތާއި އިޖުތިމާއީ ހަޔާތާއި، އިޤްތިސާދީ ކުރިއެރުމާ ގުޅިލާމެހިފައިވާ ކަންކަން ކަމަށްވެސް ފާހަގަކުރެއްވިއެވެ.
