ދައުލަތުގެ ޚަރަދުތައް ކުޑަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެޅުއްވި ފިޔަވަޅުތަކަކީ ދިވެހި މާލިއްޔަތުގެ ދެމެހެއްޓެނެވިކަން ޔަޤީންކޮށްދެއްވުމަށް އެޅުއްވި ހަރުދަނާ ފިޔަވަޅުތަކެއްކަމަށް ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.

ޕީއެންސީން ނެރުނު ބަޔާނުގައި ބުނެފައިވަނީ އަންނަ އަހަރުގެ ދައުލަތުގެ ބަޖެޓުގެ ޚަރަދުތައް ކުޑަކުރުމަށް ރައީސުލްޖުމްހޫރިއްޔާ ނިންމެވި ނިންމެވުންތަކަކީ ހަރުދަނާ އަދި ހިތްވަރުގަދަ ނިންމެވުންތަކެއް ކަމަށެވެ. މީގެ ތެރޭގައި ރައީސުލްޖުމްހޫރިއްޔާގެ އަމިއްލަފުޅު މުސާރައިގެ ދެބައިކުޅަ އެއްބައި ނުނަންގަވަން ނިންމެވުމާއި، ސިޔާސީ މުވައްޒަފުންނާއި ދައުލަތުގެ މުއައްސަސާތަކުގެ ވެރިންނާއި މަޖިލީހުގެ މެންބަރުންގެ މުސާރަތައް ކުޑަކުރުމަށް ހުށަހެޅުއްވުން ހިމެނެއެވެ.

ޕީއެންސީން ބުނިގޮތުގައި، ފާއިތުވެދިޔަ ދެތިން އަހަރު ދައުލަތުގެ ޚަރަދުތައް އިންތިހާއަށް އިތުރުވެ، ލިބޭ އާމްދަނީއާއި ކުރާ ހޭދައިގެ ފަރަގު ބޮޑުވަމުން ދިޔައިރު، ނިމިދިޔަ ސަރުކާރުން ޚަރަދުތައް ކޮންޓްރޯލުކުރުމަށް އެއްވެސް ހަރުދަނާ ފިޔަވަޅެއް އަޅާފައިނުވާކަމަށެވެ. މީގެ ނަތީޖާއެއްގެ ގޮތުން، 2022 ވަނަ އަހަރު ބަޖެޓު ޑެފިސިޓު 11.3 ބިލިއަން ރުފިޔާއަށްވުރެ އިތުރުވި އިރު، 2023 ވަނަ އަހަރު ނިމުނުއިރު ބަޖެޓު ޑެފިސިޓު 13.5 ބިލިއަން ރުފިޔާއަށްވުރެ އިތުރުވެފައިވާކަމަށް ޕީއެންސީ ބުންޏެވެ.

ޕީއެންސީގެ ބަޔާނުގައި އިތުރަށް ބުނެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެޅުއްވި މި ފިޔަވަޅުތަކަކީ ސިޔާސީ ގޮތުން އުނދަގޫ ނަމަވެސް ޤައުމުގެ ޙައްޤުގައި ނިންމަވަންޖެހޭ މުހިންމު ނިންމެވުންތަކެއް ކަމަށެވެ. އަދި މިއީ ދިވެހި މާލިއްޔަތުގެ ދެމެހެއްޓެނެވިކަން ޔަޤީންކޮށްދިނުމަށް އެޅުއްވި ހަރުދަނާ ފިޔަވަޅުތަކެއްކަމަށްވެސް ވެރިކަންކުރާ މައި ޕާޓީގެ ބުންޏެވެ.