ބިޒްނަސް ސެންޓަރ ކޯޕަރޭޝަން (ބީސީސީ) ގެ އަމާޒަކީ ދިވެހި ދަނޑުވެރިންގެ އުފެއްދުންތައް ދުނިޔޭގެ އެކި ޤައުމުތަކުގެ ބާޒާރުތަކާ ހަމައަށް ފޯރުކޮށްދިނުންކަމަށް އެ ކުންފުނީގެ މެނޭޖިން ޑިރެކްޓަރ އިބްރާހިމް ޟިޔާއު ވިދާޅުވެއްޖެއެވެ.

މި އަމާޒަށް ވާސިލުވުމުގެ ފުރަތަމަ ފިޔަވަޅެއްގެ ގޮތުން، ބީސީސީން ވަނީ އއ. ތޮއްޑޫގައި "އިހުރު ބާޒާރު" ނަމުގައި ދަނޑުވެރިންގެ މާރުކޭޓެއް ހުޅުވާފައެވެ.

ބީސީސީގެ މެނޭޖިން ޑިރެކްޓަރ އިބްރާހިމް ޟިޔާއު ވިދާޅުވި ގޮތުގައި، ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރުކޮށް ދިވެހިންނަށް ބޭނުންވާ މިންވަރަށް ދިވެހި ދަނޑުތަކުގެ އުފެއްދުންތެރިކަން އިތުރުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ސިޔާސަތެކެވެ.

"ރާއްޖޭގައި ހެދޭ ފާހަގަކުރެވޭ ތަރުކާރީއާއި މޭވާގެ ބާވަތްތައް ބާޒާރަށް ބޭނުންވާ މިންވަރަށް ހައްދާ، އެތަކެތި ވިއްކުމުގެ ނިޒާމެއް ޤާއިމް ކުރުމަކީ ރައީސުލްޖުމްހޫރިއްޔާގެ ރިޔާސީ ވަޢުދެއް. އަޅުގަނޑުމެން މިދަނީ އެ ވަޢުދު ފުއްދުމަށް މަސައްކަތްކުރަމުން." ޟިޔާއު ވިދާޅުވިއެވެ.

މި މަޤްޞަދު ހާސިލުކުރުމަށްޓަކައި ބީސީސީން އއ. ތޮއްޑޫގައި ހުޅުވި މާރުކޭޓަކީ ދަނޑުވެރިކަމުގެ އުފެއްދުންތަކަށް ޚާއްޞަކޮށްގެން ރާއްޖޭގެ ރަށެއްގައި ބީސީސީން ހުޅުވި ފުރަތަމަ މާރުކޭޓެވެ.

ޔޫ.އެން.ޑީ.ޕީއާއި ޖަޕާން ސަރުކާރުގެ އެހީގައި ހުޅުވި މި މާރުކޭޓުގައި ތޮއްޑޫގައި ދަނޑުވެރިކަންކުރާ ފަރާތްތަކަށް ވިޔަފާރި އުސޫލުން 10 ކިއޮސްކު ދޫކޮށްފައިވެއެވެ. މި ކިއޮސްކުތަކުގައި ތޮއްޑޫގެ ދަނޑުވެރިން ހައްދާ މޭވާއާއި ތަރުކާރީގެ ބާވަތްތަކުގެ އިތުރުން އަގު އެއްކުރި ބާވަތްތައްވެސް ވިއްކަން ހުންނާނެއެވެ.

ޟިޔާއު ވިދާޅުވީ، މި މަޝްރޫޢުގެ އަމާޒަކީ ހަމައެކަނި ރާއްޖޭގެ ބާޒާރު ނޫންކަމަށެވެ. "އަޅުގަނޑުމެންގެ އުއްމީދަކީ ދުނިޔޭގެ އެކި ޤައުމުތަކުގައި ދިވެހި ދަނޑުވެރިން އުފައްދާ އުފެއްދުންތައް ފެނިގެން ދިއުން." އޭނާ ވިދާޅުވިއެވެ.

މިފަދަ މާރުކޭޓުތައް ރާއްޖޭގެ އެހެން ސަރަޙައްދުތަކުގައިވެސް ޤާއިމުކުރުމުގެ ވިސްނުން ބީސީސީން ގެންގުޅޭ ކަމަށް ޟިޔާއު ވަނީ ހާމަކުރައްވާފައެވެ.

"މިއީ ހަމައެކަނި ފުރަތަމަ ފިޔަވަޅު. ކުރިއަށް އޮތްތަނުގައި އަޅުގަނޑުމެން މަސައްކަތް ކުރާނީ ރާއްޖޭގެ އެހެން ސަރަހައްދުތަކުގައިވެސް މިފަދަ ބާޒާރުތައް ހުޅުވަން. މިކަމުގެ ސަބަބުން އަޅުގަނޑުމެންގެ އަމާޒަށް ވާސިލުވުމަށް އިތުރު ފުރުސަތުތަކެއް ލިބިގެންދާނެ." ޟިޔާއު ވިދާޅުވިއެވެ.

މި މަޝްރޫޢުގެ ސަބަބުން ދިވެހި ދަނޑުވެރިންގެ އުފެއްދުންތައް ރާއްޖޭގެ ފަތުރުވެރިކަމުގެ ދާއިރާއަށް ތަޢާރަފުވެ، އަދި ފަހުގެ މަރުޙަލާއެއްގައި ބައިނަލްއަޤްވާމީ ބާޒާރުތަކަށް ނެރުމުގެ ފުރުސަތު ލިބިގެންދާނެ ކަމަށް އުއްމީދު ކުރެވެއެވެ. މިއީ ދިވެހިރާއްޖޭގެ ދަނޑުވެރިކަމުގެ ދާއިރާ ކުރިއެރުވުމަށް އެޅޭ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.

ބީސީސީގެ މި މަސައްކަތްްތަކަކީ ހަމައެކަނި ދަނޑުވެރިކަމުގެ ދާއިރާއަށް އަމާޒުކޮށްގެން ކުރާ މަސައްކަތްތަކެއް ނޫނެވެ. ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ބީސީސީން ދަނީ އެހެނިހެން ދާއިރާތަކުގައިވެސް ގިނަގުނަ މަސައްކަތްތަކެއް ކުރަމުންނެވެ. މީގެ ތެރޭގައި ވިޔަފާރިވެރިންނަށް ތަމްރީނު ޕްރޮގްރާމްތައް ހިންގުމާއި، ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމާއި، އަދި ވިޔަފާރިތަކަށް ބޭނުންވާ ވަސީލަތްތައް ފޯރުކޮށްދިނުން ހިމެނެއެވެ.