ރައްޔިތުންގެ މަޖިލީހުން މިއަދު ބޭއްވި ޖަލްސާގައި އެޓޮމިކް ހަކަތައާބެހޭ ބައިނަލްއަޤްވާމީ އިދާރާ، އައިއޭއީއޭގައި ރާއްޖެއިން ބައިވެރިވުމަށް ރުހުންދީފިއެވެ. މި ނިންމުން ފާސްކޮށްފައިވަނީ ވޯޓުގައި ބައިވެރިވި 61 މެންބަރުންގެ އިއްތިފާޤުންނެވެ.

އައިއޭއީއޭގައި ބައިވެރިވުމަށް މަޖިލީހުން ރުހުން ދީފައިވަނީ ވަޒީރުންގެ މަޖިލީހުގެ ނިންމެވުމާ ގުޅިގެން ރައީސުލްޖުމްހޫރިއްޔާ އެ މައްސަލަ މަޖިލީހަށް ހުށަހެޅުއްވުމުން، ޚާރިޖީ ގުޅުންތަކުގެ ކޮމިޓީން އެ މައްސަލަ ދިރާސާ ކުރުމަށްފަހުއެވެ. މި ނިންމުމުގެ މައިގަނޑު މަޤްޞަދަކީ ނިއުކްލިުކްލިއަރ މެޑިސިންގެ ދާއިރާއިން ރާއްޖެއަށް އެހީތެރިކަން ހޯދުމެވެ.

ސަރުކާރުން ވިދާޅުވެފައިވާ ގޮތުގައި އައިއޭއީއޭއާ ގުޅުމުގެ މަސައްކަތުގައި އިސްކޮށް ހަރަކާތްތެރިވާނީ ދިފާޢީ ވުޒާރާއިންނެވެ. އަދި މިއީ ދިގު މުއްދަތެއްގެ ތެރޭގައި ކުރިއަށްދާނެ މަސައްކަތެއް ކަމަށްވެސް ސަރުކާރުން ފާހަގަކުރައްވާފައިވެއެވެ.

އައިއޭއީއޭއަކީ 1957 ވަނަ އަހަރު އުފެދުނު ޖަމްޢިއްޔާއެކެވެ. މި މި ޖަމްޢިއްޔާގެ މައިގަނޑު މަޤްޞަދަކީ ހަނގުރާމައިގެ ބޭނުމަށް ނިއުކްލިއަރ ހަކަތަ ބޭނުންކުރިޔަ ނުދިނުމާއި، އޭގެ ފައިދާ ރަނގަޅުގޮތުގައި ބޭނުންކުރުމަށް އެހީތެރިވެދިނުމެވެ. މިހާރު މި ޖަމްޢިއްޔާގައި 178 މެންބަރު ޤައުމު ހިމެނެއެވެ.