މި ސަރުކާރުން ވޭޕް މަނާކުރަން ޖެހުނީ ކުރީގެ ސަރުކާރުތަކުން އެ ތަކެތި ރެގިއުލޭޓްކުރުމަށް ފިޔަވަޅު އަޅާފައިނުވާތީ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙުމަދު ނާޡިމް ވިދާޅުވެއްޖެއެވެ. ނާޡިމް މިހެން ވިދާޅުވީ އިއްޔެ ރައްޔިތުންގެ މަޖިލީހުގައި، ދުންފަތް އެކުލެވޭ އުފެއްދުންތަކުން ނަގާ އިމްޕޯޓް ޑިއުޓީ ބޮޑުކުރުމަށް ހުށަހަޅާފައިވާ ބިލަށް ވާހަކަފުޅު ދައްކަވަމުންނެވެ.

ނާޡިމް ވިދާޅުވިގޮތުގައި ދުންފަތް ކޮންޓްރޯލް ކުރުމުގެ ޤާނޫނު ތަޢާރަފުކުރެވުނުއިރު ވޭޕަކީ ދިވެހިން ދަންނަ އެއްޗެއް ނޫނެވެ. ނަމަވެސް މިހާރު ވޭޕް ބޭނުންކުރުން އާންމުވެފައިވާއިރު، އެކަން ރެގިއުލޭޓް ކުރުމަށް ކުރީގެ ސަރުކާރުތަކުން ފަސްޖެހިފައިވާ ކަމަށް އެމަނިކުފާނު ފާހަގަކުރެއްވިއެވެ.

"ބޭރުގެ އެހެން ޤައުމުތަކުގައި ވޭޕަށް ޓެކްސް ނަގަމުންދިޔައީ ސިނގިރޭޓަކަށް ކުރާގޮތަށް... އެކަމަކު ރާއްޖޭގައި އެކަން އެގޮތަށް ނުގެނެވުމުގެ ސަބަބުން ވޭޕްގެ ކަންތައްތައް ފެތުރިގެންގޮސް ބޮއްސުންލައިގެންގޮސް ވަބާއަކަށްވާ ހިސާބުން ސަރުކާރުން މިވަނީ ވޭޕް މަނާކުރަން ނިންމާފައި،" ނާޡިމް ވިދާޅުވިއެވެ.

މީގެ އިތުރުން، ނާޡިމް ވަނީ ރައްޔިތުންގެ ސިއްޙަތަށް ގެއްލުންދޭ ތަކެތިން އިމްޕޯޓް ޑިއުޓީ ނެގުމުގެ އިތުރަށް އެކްސައިޒް ޓެކްސް ނަގަންޖެހޭކަމަށް ވެސް ވިދާޅުވެފައެވެ. އެގޮތުން، އެނާޖީ ޑްރިންކާއި ހަކުރު ފަދަ ތަކެތިން ޓެކްސް ނަގަން ޖެހޭކަން އެމަނިކުފާނު ފާހަގަކުރެއްވިއެވެ.

ނާޡިމް ވިދާޅުވިގޮތުގައި މި ބަދަލުތައް ގެންނަންޖެހެނީ ރާއްޖެއިން ސިއްޙީ ދާއިރާއަށް ކުރާ ހޭދައަށް ބެލުމަށްފަހުގައެވެ. އެމަނިކުފާނު ފާހަގަކުރެއްވި ގޮތުގައި ދިރިއުޅުމުގެ އާދަތައް ސިއްޙަތަށް ނުރައްކާވާގޮތަށް ބެހެއްޓުމަށްފަހު އާސަންދައަށް ބަރޯސާވުމުގެ ސަބަބުން ދައުލަތުގެ އާމްދަނީއާ ނުބައްދަލު ޚަރަދެއް ކުރަންޖެހޭ ކަމަށެވެ.

ނާޡިމް އިތުރަށް ވިށް ވިދާޅުވީ ސިނގިރޭޓުން ނަގާ ޑިއުޓީ ބޮޑުކުރުމުން ދުންފަތާ ދުރަށް ދިއުމުގެ ފުރުސަތު އޮތް ނަމަވެސް، ޤާނޫނުގައި ސަރުކާރުގެ އިދާރާތަކަށް ލިބިފައިވާ ބާރުގެ ދަށުން ހަދާފައިވާ ގަވާއިދުތައް ތަންފީޛު ނުކުރެވެނީސް ދުންފަތުގެ މައްސަލައަށް ފުރިހަމަ ހައްލެއް ނުލިބޭނެ ކަމަށެވެ.

"އަޅުގަނޑުމެންގެ މި ގަވާއިދުތައް ރަނގަޅަށް ތަންފީޒުކުރެވި ބްލެކް މާކެޓުގައި އެއެއްޗެހި (ސިނގިރޭޓް) ނުގަނެވޭނެގޮތަށް ރާވައި، އަދި ހަމައެއާއެކު ސްމަގަލް ނުކުރެވޭނެ ގޮތްތައްވެސް އަޅުގަނޑުމެން އެބަޖެހޭ ރާވަން،" ނާޡިމް ވިދާޅުވިއެވެ.

އެމަނިކުފާނު އިންޒާރު ދެއްވީ ޑިއުޓީ ބޮޑުކުރުމުން ރާއްޖެއަށް ދަށް ކޮލިޓީގެ ސިނގިރޭޓު އިތުރުވެ، އޭގެ ކަޅު ބާޒާރެއް އުފެދުމުގެ ފުރުސަތު އޮތް ކަމަށެވެ. މި ފުރުސަތުތައް ނައްތާލުމަށް އިތުރު ބަދަލުތައް ގެންނަންޖެހޭކަން ވެސް ނާޡިމް ފާހަގަކުރެއްވިއެވެ.