ބިނާވެށި ޕްލޭންކުރުމާއި ހިންގުމުގެ ޤާނޫނުގައި އަތޮޅު ކައުންސިލްތަކުގެ އިޚްތިޞާޞް ހިމެނުމަށްޓަކައި، އެންމެ ފުރަތަމަ ލާމަރުކަޒީ ޤާނޫނު އިޞްލާޙުކުރަންޖެހޭ ކަމަށް ހެންވޭރު އުތުރު ދާއިރާގެ މެންބަރު އަޙްމަދު އައިފާން ވިދާޅުވެއްޖެއެވެ. މެންބަރު މިހެން ވިދާޅުވީ އިއްޔެ ބޭއްވުނު ޤައުމީ ތަރައްޤީއާއި ތަރިކައިގެ ކޮމިޓީއާއި ލާމަރުކަޒީ ކޮމިޓީގެ ޖޮއިންޓް ކޮމިޓީގެ ބައްދަލުވުމުގައެވެ.
މި ބައްދަލުވުމުގައި ބިނާވެށި ޕްލޭން ކުރުމާއި ހިންގުމުގެ ޤާނޫނާއި އަރބަން ޑިވަލޮޕްމެންޓްގެ ބިލާ ގުޅޭގޮތުން މަޝްވަރާކުރެވުނެވެ. މިލަންދުންމަޑުލު އުތުރުބުރީ އަތޮޅު ކައުންސިލުން ހުށަހަޅާފައިވާ ޤަރާރެއްގައި، ބިނާވެށި ޕްލޭންކުރުމާއި ހިންގުމުގެ ޤާނޫނުގައި އަތޮޅު ކައުންސިލްތަކުގެ އިޚްތިޞާޞެއް ހިމަނާފައިނުވާކަމުގެ ކަންބޮޑުވުން ފާޅުކޮށްފައިވެއެވެ.
އައިފާން ވިދާޅުވީ، 2010 ވަނަ އަހަރު އެކުލަވާލެވުނު ލާމަރުކަޒީ ޤާނޫނުގައި އިޚްތިޞާޞެއް އޮންނަ ކަމަށް ބަޔާންކޮށްފައި އޮންނަނީ ހަމައެކަނި ރަށާއި ސިޓީ ކައުންސިލްތަކުގެ ކަމަށެވެ. އެހެންކަމުން، ބިނާވެށި ޕްލޭންކުރުމާއި ހިންގުމުގެ ޤާނޫނުގައި އަތޮޅު ކައުންސިލްތަކުގެ އިޚްތިޞާޞެއް ހިމެނޭނީ ލާމަރުކަޒީ ޤާނޫނު އިޞްލާޙުކުރުމަށްފަހުގައި ކަމަށް އޭނާ ފާހަގަކުރެއްވިއެވެ.
Advertisement
މީގެއިތުރުން، އަރބަން ޑިވަލޮޕްމެންޓްގެ ބިލާ ގުޅޭގޮތުން މިލަންދުންމަޑުލު އުތުރުބުރީ އަތޮޅު ކައުންސިލުން ހުށައަޅާފައިވާ ސިޓީގައި، އެ ބިލު އޮތްގޮތުން ލާމަރުކަޒީ ޤާނޫނުގެ ދަށުން ކައުންސިލްތަކަށް ލިބިދޭ ބާރުތައް ހަނިވާކަމަށް ތުހުމަތުކޮށްފައިވާ ކަމަށް މައްޗަންގޮޅި މެދު ދާއިރާގެ މެންބަރު އަޙްމަދު ޟަމީރު ފާހަގަކުރެއްވިއެވެ. ނަމަވެސް، މި ތުހުމަތުތަކުގައި ބާރުތައް ނިގުޅައިގަނެވެނީ ކިހިނެއްކަން ނުވަތަ ނިގުޅައިގަނެވޭކަން ސާބިތުކޮށްދެވިފައިނުވާ ކަމަށް ޟަމީރު ވިދާޅުވިއެވެ.
