ރާއްޖޭގައި މަސްތުވާތަކެތީގެ ހާލަތު ދެނެގަތުމަށް އައު ދިރާސާއެއް ކުރިއަށް ގެންދިޔުމަށް ނިންމާފައިވާ ކަމަށް ނެޝަނަލް ޑްރަގް އެޖެންސީ (އެންޑީއޭ) އިން ހާމަކޮށްފިއެވެ. މި މަޢުލޫމާތު ހާމަކުރެއްވީ މިއަދު ބޭއްވުނު ނޫސްވެރިންގެ ބައްދަލުވުމެއްގައި އެންޑީއޭގެ އެކްޓިން ސީއީއޯ މުހައްމަދު ރާޝިދެވެ.

މި ބައްދަލުވުމުގައި ވާހަކަ ދައްކަވަމުން މުހައްމަދު ރާޝިދު ވިދާޅުވީ މުޅި ރާއްޖެއަށް އަމާޒުކޮށްގެން މި ދިރާސާ ކުރުމަށް ނެޝަނަލް ޑްރަގް ކައުންސިލުން އެންޑީއޭއަށް އަންގާފައިވާ ކަމަށެވެ. "ނެޝަނަލް ޑްރަގް ކައުންސިލުން އެންޑީއޭއަށް އަންގާފައިވޭ މި ދިރާސާ ކުރުމަށް. އަޅުގަނޑުމެން އިރާދުކުރެއްވިއްޔާ އެ ދިރާސާގެ މަސައްކަތް ކުރިއަށްދާނެ" ރާޝިދު ވިދާޅުވިއެވެ.

އެންޑީއޭގެ ޗެއަރޕާސަން ލުބްނާ ޒާހިރު ވިދާޅުވީ މި ދިރާސާއަށް ތައްޔާރުވުމުގެ ގޮތުން ފާއިތުވި 5 އަހަރު މަސްތުވާތަކެތީގެ މައްސަލަތަކުގައި ކޭސް ކުރި މީހުންގެ އަދަދުތައް ފުލުހުން މެދުވެރިކޮށް ނަގަމުންދާ ކަމަށާއި، ކައުންސިލްތަކުން ވެސް މަޢުލޫމާތު ހޯދަން ފަށާފައިވާ ކަމަށެވެ. އަދި މި ދިރާސާ ކުރިއަށް ގެންދާނެ ގޮތަކާމެދު ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އާއެކު މަޝްވަރާ ކުރަމުންދާ ކަމަށްވެސް އޭނާ ހާމަކުރެއްވިއެވެ.

ފާހަގަކޮށްލެވޭ ކަމަކީ ރާއްޖޭގައި ނެޝަނަލް ޑްރަގް ދިރާސާއެއް އެންމެ ފަހުން ކުރިއަށް ގެންގޮސްފައިވަނީ 2012 ވަނަ އަހަރު ކަމެވެ. އޭގެ ފަހުން މިފަދަ ފުޅާ ދާއިރާއެއްގައި ދިރާސާއެއް ކުރެވިފައެއް ނުވެއެވެ. ފުލުހުންގެ މަޢުލޫމާތު ދައްކާގޮތުގައި ރާއްޖޭގެ ހުރިހާ ރަށެއްގައިވެސް މަސްތުވާތަކެތީގެ މައްސަލަ ހިނގާފައިވެއެވެ. އަދި އެންމެ ފަހުގެ ދިރާސާތަކުން ދައްކާގޮތުގައި ދިވެހިރާއްޖޭގައި މަސްތުވާތަކެތި ބޭނުންކުރާ 7500 ވަރަކަށް މީހުން އުޅެއެވެ.

މި އައު ދިރާސާއިން ރާއްޖޭގެ މަސްތުވާތަކެތީގެ ހާލަތާ ބެހޭ އެންމެ ފަހުގެ މަޢުލޫމާތު ލިބި، މި ބޮޑު މައްސަލައާ ކުރިމަތިލުމަށް އެޅިދާނެ ފިޔަވަޅުތައް ދެނެގަތުމަށް އެހީތެރިވެދޭނެ ކަމަށް އުންމީދު ކުރެވެއެވެ.