ދުންފަތުގެ މައްސަލަ ހައްލުކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކުރިއަށް އޮތް ހަތަރު އަހަރުގެ ތެރޭގައި ދުންފަތުގެ އިސްތިއުމާލު ކުރުމަށް ހައްލެއް ހޯދުމަށް އަމާޒުކޮށްގެން މާސްޓާ ޕްލޭނެއް އެކުލަވާލުމުގެ މަސައްކަތް ފަށާފައި ކަމަށް ރައީސް އޮފީހުން ބުނެފިއެވެ.

ރައީސް އޮފީހުން ބުނި ގޮތުގައި މި ފުރިހަމަ މާސްޓަރ ޕްލޭން ކެބިނެޓަށް ހުށަހަޅާނީ މި މަހުގެ 27 ވަނަ ދުވަހު ބާއްވާ ބައްދަލުވުމެއްގައެވެ.

ދުންފަތުގެ އިސްތިއުމާލު ނުކުރާ މުޖުތަމަޢަކަށް ރައީސް ޑރ. މުޢިއްޒުގެ ތަޞައްވުރާ ބެހޭގޮތުން ބޭއްވި ވަޒީރުންގެ މަޖިލީހުގެ ބައްދަލުވުމެއްގައި ވަރަށް ބޮޑަށް މަޝްވަރާކޮށްފައި ވެއެވެ. އެ ޕްލޭންގައި ދުންފަތުގެ އިސްތިޢުމާލު ނުކުރާ ރަށްތައް ބަލައިގަނެ އެ ރަށްތަކަށް އިނާމު ދިނުމާއި އެރަށްތަކަށް މާލީ އެހީތެރިކަން ފޯރުކޮށްދިނުން ފަދަ ތަފާތު ކަންތައްތައް ހިމަނައެވެ. މިއީ މުޅި ރާއްޖެއިން ދުންފަތުގެ އިސްތިޢުމާލުކުރުން ނައްތާލުމަށް ނުވަތަ ކޮންޓުރޯލް ކުރުމަށް ހީވާގިކަމާއެކު މަސައްކަތް ކުރުމަށް ހިތްވަރު ދިނުމަށް ފަރުމާކުރެވޭ ޕްލޭނެކެވެ. ފާހަގަކޮށްލަން ޖެހޭ ގޮތުގައި 1990 ގެ އަހަރުތަކުގައި ވެސް ދުންފަތުގެ އިސްތިޢުމާލު ނުކުރާ ފަރާތްތަކާއި ރަށްތަކަށް އޭރުގެ ސަރުކާރުން ހިތްވަރު ދިނެވެ. އެ ޕްރޮގްރާމުގެ ތެރެއިން ވަރަށް ގިނަ ބަޔަކު ދުންފަތާއި ދުރަށް ވެސް ދިޔައެވެ. ނަމަވެސް އެ ޕްރޮގުރާމް ވަކި ހިސާބަކުން ހުއްޓުނީއެވެ.

މިހާރުގެ ސަރުކާރުގެ ޕްލޭންގެ މުހިންމު ސިފައަކީ ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ ފަރާތްތަކަށް ހިލޭ، ޚާއްޞަ ފަރުވާއެއް ވެސް ތަޢާރަފް ކުރުމެވެ. މި ޚިދުމަތްތައް ރާއްޖޭގެ ކޮންމެ ރަށެއްގެ ޞިއްޙީ ޚިދުމަތްދޭ މަރުކަޒުތަކުން ފޯރުކޮށްދޭނެ ކަމަށާއި، ދުންފަތަށް ދެވިހިފާފައި ތިބޭ ފަރާތްތަކަށް އެހީތެރިކަން ފުޅާ ދާއިރާއެއްގައި ލިބޭނެ އިންތިޒާމު ހަމަޖައްސައިދޭނެ ކަމަށްވެސް ރައީސް އޮފީހުން ބުނެފައި ވެއެވެ.

ރައީސުލްޖުމްހޫރިއްޔާގެ މި މާސްޓަރ ޕްލޭނަކީ ހުރިހާ ރައްޔިތުންނަށް ދެމެހެއްޓެނިވި އަދި ފާގަތި މުސްތަޤުބަލެއް ބިނާކުރުމަށް ކުރަމުންދާ މަސައްކަތުގެ ތެރެއިން ބައެކެވެ. ވޭޕް ރާއްޖެއަށް އެތެރެކުރުން ހުއްޓުވާލުމާއެކު ޖުމްލަ ދެ މަރުޙަލާއަކުން ދިވެހިން ވޭޕް ކުރުމުގެ ނުބައި އާދައާއި މުޅިން ދުރުކޮށްލާއިރު، އެމަނިކުފާނުގެ ދުންފަތާއި ދެކޮޅު މާސްޓަޕްލޭނުން ރާއްޖެއަކީ ދުޅަހެޔޮ ޞިއްޙަތަކަށް ވަކާލާތުކުރާ މީހުން ނިސްބަތުން އެންމެ ގިނަ ޤައުމަށް ވާނެއެވެ. މިހާތަނަށް ދުނިޔޭގައި "ސްމޯކިންގ ފްރީ" އެއްވެސް ޤައުމެއް އަދި ސިޓީއެއްވެސް ނެތެވެ.