ސާޅީސް އަހަރުން މަތީގެ ހުރިހާ ދިވެހި އަންހެނުން އުރަމަތީގެ ކެންސަރަށް ޓެސްޓު ކުރުމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ގޮވާލައްވައިފިއެވެ.

އެކަމަނާ މިކަމަށް ގޮވާލެއްވީ އުރަމަތީގެ ކެންސަރާބެހޭ ހޭލުންތެރިކުރުމުގެ ޤައުމީ ސިމްޕޯޒިއަމް އިފްތިތާޙްކުރުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްވަމުންނެވެ.

^{އުރަމަތީގެ ކެންސަރާބެހޭ ހޭލުންތެރިކުރުމުގެ ޤައުމީ ސިމްޕޯޒިއަމް އިފްތިތާޙްކުރުމުގެ ރަސްމިއްޔާތުގެ ތެރެއިން / ފޮޓޯ: ރައީސް އޮފީސް}

ރާއްޖޭގައި އުރަމަތީގެ ކެންސަރު ޖެހޭ މިންވަރު އިތުރުވަމުންދާކަން ފާހަގަކުރައްވައި މި ބާވަތުގެ ކެންސަރަކީ ބަލިން ފަސޭހަވުމަށްފަހު ވެސް އޭގެ އަސަރުތައް އަންހެނުން ތަހައްމަލްކުރަންޖެހޭ ނުރައްކާތެރި ކެންސަރެއްކަމަށް ވިދާޅުވަމުން، މެޑަމް ވަނީ 40 އަހަރުން މަތީގެ އުމުރުފުރައިގެ ހުރިހާ އަންހެނުންވެސް މެމޮގްރާމެއް ހެއްދެވުމަށް އިލްތިމާސް ކުރައްވާފައެވެ. ކުރީބައިގައި އުރަމަތީގެ ކެންސަރު ހުރިކަން ދެނެގަނެވިއްޖެނަމަ، އަވަސް ފަރުވާއިން ބަލިން ފަސޭހަވުމުގެ ފުރުޞަތު އޮންނަކަމަށާއި މިހާރު ރާއްޖޭގައި ވެސް ކެންސަރަށް ދެވޭ އެކި ފަރުވާތައް ހުރިކަމަށް ސާޖިދާ ފާހަގަކުރެއްވިއެވެ. އޭގެ ތެރޭގައި ކީމޯތެރަޕީގެ ހިދުމަތް ހިމެނެއެވެ. އަދި އައިޖީއެމްއެޗްގައި މިހާރު ތްރީޑީ މެމޮގްރާމެއް ހެދޭތީ، މެމޮގްރާމެއް ހެއްދުމަށް ކޮންމެހެން ރާއްޖެއިން ބޭރަށް ދާން ނުޖެހޭނެކަމަށްވެސް އެކަމަނާ ވިދާޅުވިއެވެ.