އުފަންވާއިރު ނާޒުކު ހާލަތުގައި ތިބޭ ކުދިންގެ ފަރުވާއާ ގުޅޭގޮތުން ބާއްވާ 2 ވަނަ ނިއޯނޭޓަލް ކޮންފަރެންސް ރަސްމީކޮށް ފަށައިފިއެވެ. މިދިޔަ އަހަރު ފެށި މި ކޮންފަރެންސް މިއަހަރު އިފްތިތާހްކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ. މި ރަސްމިއްޔާތުގެ ތެރެއިން އެކަމަނާ ވަނީ ފުރަތަމަ "ނިއޯކެއަރ އަދި އެންއައިސީޔޫ ނިއުސް ބުލެޓިން" ވެސް ނެރެދެއްވާފައެވެ.

މި ރަސްމިއްޔާތުގައި ވާހަކަދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާގް ހަލީމް ވިދާޅުވީ، ނާޒުކު ހާލަތުގައި ތިބޭ ކުދިންގެ ފަރުވާ ބިނާވަނީ ހަމައެކަނި އެންއައިސީޔޫގައި ދެވޭ ފަރުވާއަށް ނޫން ކަމަށާއި، މުޅި ހޮސްޕިޓަލުގެ ސިއްހީ ފަރުވާވަނީ އެކުދިންގެ ރައްކާތެރިކަމާ ގުޅިފައި ކަމަށެވެ. އަދި މިދިޔަ އަހަރު ނަރުހުންގެ ކޮންފަރެންސަކުން ފެށި މި މަސައްކަތް މިއަހަރު މަލްޓިޑިސިޕްލިނަރީ ޕްލެޓްފޯމެއްގެ ގޮތުގައި ފެށިގެން ދިއުމުން، ތަޖުރިބާ ހިއްސާކޮށް މި ދާއިރާއަށް ބޭނުންވާ ހާއްސަ ސަމާލުކަން ލިބިގެންދާނެ ކަމަށް އޭނާ ފާހަގަކުރެއްވިއެވެ.

މި ރަސްމިއްޔާތުގައި ޑަބްލިއުއެޗްއޯއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޕޭއިޑެން ދެއްކެވި ވާހަކަފުޅުގައި، ސިއްހީ ދާއިރާއިންނާއި ވަކިން ހާއްސަކޮށް ދަރިމައިވުމުގެ ދާއިރާއިން ރާއްޖެއިން ބައިނަލްއަގްވާމީ އަދި ސަރަހައްދީ ފެންވަރުގައި ބޮޑެތި ކުރިއެރުންތަކެއް ހާސިލުކޮށްފައިވާކަން ފާހަގަކުރެއްވިއެވެ.

ހުޅުމާލޭ ހޮސްޕިޓަލުން އިންތިޒާމުކޮށްގެން 3 ދުވަހުގެ މުއްދަތަށް ކުރިއަށްގެންދާ މި ކޮންފަރެންސްގައި 19 ހޮސްޕިޓަލެއްގެ އެންއައިސީޔޫގައި މަސައްކަތްކުރާ ޑޮކްޓަރުންނާއި ނަރުހުން ބައިވެރިވާނެއެވެ.