މާލެ ސިޓީ ކައުންސިލް ހިންގުމުގައި ދަތިވާ އެއްވެސް ކަމެއް ނެތް ކަމަށާއި، ސަރުކާރުން ފުރިހަމަ އެއްބާރުލުމެއް ލިބެމުންދާ ކަމަށް މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެއެވެ.
އާާޒިމް މިހެން ވިދާޅުވީ، އެމްޑީޕީން ކުޅުދުއްފުށީގައި މިއަދު ބޭއްވި ކައުންސިލަރުންގެ ކޮންފަރެންސްގައި ވާހަކަ ދައްކަވަމުންނެވެ.
ކޮންފަރެންސްގައި ވާހަކަ ދައްކަވަމުން އާޒިމް ވިދާޅުވީ މާލެ ސިޓީ ކައުންސިލް ހިންގުމަށް ދަތިވާ އެއްވެސް ކަމެއް ނެތް ކަމަށެވެ. އެގޮތުން އެ ކައުންސިލުގައި އެހީވުމަށް 15 ކޮންސަލްޓެންޓުން ނަގާފައިވާ ކަމަށާއި އޭގެ ތެރެއިން އެކަކު ފިޔަވާ އެންމެންނަކީ އެމްޑީޕީއަށް ނިސްބަތްވާ މެންބަރުންކަންވެސް އާޒިމް ފާހަގަކުރެއްވިއެވެ.
"އަޅުގަނޑު ކުރާ ގޮތަކީ ރައްޔިތުންނަށް ގުޅުން ހުރި ކަންތައްތައް ނޫނީއްޔާ އަޅުގަނޑު ނުގެންދަނީ. ދެން ރައްޔިތުންނާއި ގުޅުން ހުރިކަންކަން ލައިވް ކުރަނީ. އެމީހުންވެސް [ސަރުކާރުން] ވެސް ބޭނުންވޭ ކަންތައްތައް ކުރަން. އެހެންވީމަ އެގޮތަށް އެބަވޭ." އާޒިމް ވިދާޅުވިއެވެ.
އާޒިމްގެ ވާހަކަ ނިންމަވާލެއްވުމުން ކޮންފަރެންސް ރިޔާސަތުގައި އިންނެވި އެމްޑީޕީގެ ޗެއަރޕާސަން ފައްޔާޒު ވަނީ އާޒިމްގެ ވާހަކަތައް ސޯޝަލް މީޑިއާގައި ހިއްސާކުރެއްވުމުގެ ކުރިން އެޑިޓް ކުރުމަށް އެދިލައްވާފައެވެ. އެގޮތުން އެމްޑީޕީގެ މެންބަރުންނަށް ކޮންސަލްޓަންޓުންގެ މަޤާމުދޭކަން ފާހަގަކުރައްވާ އާޒިމް ދެއްކެވި ވާހަކަ އުނިކުރުމަށްވެސް ފައްޔާޒު އެދިފައިވާއިރު، މިހެން ފައްޔާޒަށް ބުނެވުނީ އެވަގުތު ލައިވް ކުރާކަން ނޭނގިއެވެ.
އާޒިމް ވަނީ މީގެ ކުރިންވެސް ސަރުކާރުގެ އެއްބާރުލުން ލިބޭ ކަމަށް ވިދާޅުވެފައެވެ. އެގޮތުން ސަރުކާރުގެ މަޝްރޫޢުތައް ހިންގުމަށް ސަރުކާރާއި ގުޅިގެން ގިނަ މަސައްކަތްތައް އަންނަނީ ކުރައްވަމުންނެވެ.
ސަރުކާރުން ކައުންސިލްތަކަށް އެއްބާރުލުން ދެމުންދާއިރު، ރައީސުލްޖުމްހޫރިއްޔާ ޑރ. މުހައްމަދު މުޢިއްޒަކީ މާލެ ސިޓީ ކައުންސިލަށް ވަޑައިގެން، އެ ކައުންސިލްގެ ޖަލްސާއެއްގައި ބައިވެރިވެވަޑައިގެންނެވި ފުރަތަމަ ރައީސެވެ. އަދި އެމަނިކުފާނު އެ ކައުންސިލްގެ އަންހެނުން ތަރައްޤީއަށް މަސައްކަތް ކުރާ ކޮމެޓީއާއިވެސް ވަނީ ބައްދަލުކުރައްވާފައެވެ.
